Zo zachiesan raak ik zo frustreerd as de pest !
Ik har zó geern naogeslacht op de wereld zet, mar ’t lop aal weer op niks oet.
Ik en mien vrouwgien hebt een hiele mooie vekaansie had.
’t Baosien har geluk, want wij mussen een chauffeur hebben, dus hie much ok met.
Met oes campertien bin wij langs de hiele Nederlandse kust trökken, van Den Helder tot an Hoek van Holland. Het weer warkte met en wij hebt hiel veul zien.
Jonge, jonge, ik kan der wal een boek over schrieven.
Dennende van die teckelclub is met heur man ok ’n daggien bij oes op vesite west, toen wij in Egmond aan Zee waren.
’t Mag wal in de kraant heur, want Henkie kan niet bar best van hoes. Ja, ij leest ’t goed, der stiet gien Henk, mar Henkie. Dat komp umdat e niet slim oet de kloeten wossen is, hef vrogger niet genog schuppen under de kont had, denk ik.
Mar hie kan zuk der best um redden en hie hef non toch ies een keertie deurbeten.
Het was béregezellig !!
Toen ze weer op hoes an gungen, hadden ze de pokkel goed verbraand, mar ’t kun ze niks verrekken, zie gaven gien krimp.
Ja jong, an zee met zun en wind, dat is hiel verraoderlijk.
Wat hef Zweel op de kop staon hè ?
As ’t vrouwgien met de auto hen de winkel wol, dan mus ze net as De Loozangers lèest Keulen en Aken in de rondte, of zoas de veurzitster ’t nuumde :
langs de Ommelanderweg.
Ja, ij muchten echt niet deur ’t darp heur !
Oebel hef mien vrouwgien al een keer weerum stuurd.
Hie hef geluk had, dat ik der niet bij was, want dan was e nog niet jaorig west.
Welkenden, die lillijk tegen mien vrouwgien doet, die kriegt het met mij an de stok !
En dat plietsiepakkien he’k niks in de reken, want ik bin under en boven de wet.
Hie hef ’t wal ’n beetien bij mij verbruid.
Zien vrouw is ’n best wicht, die mag ik hiel geern lieden, want die waardeert mien schrieverij. Dat las ik in oes eigen kraantien.
Tja, ij kunt mij beter vangen met stroep as met edik.
Woefffff !!
