Artikel
Klingelekloties :

Oes Binkie hef klingelekloties, zie zwaait vrolijk hen en weer en dat brengt nogal wat teweeg.

Een toertie leden waren manlief en ik en Binkie op de camping bij een motorcross grandprix in Brabant neerstreken. Manlief giet dan hen de wedstrieden hen kieken en Bink en ik kuiert wat en ik lees wat opgespaarde weekbladen en zo, op zien tied een patattie of een broodje hamburger, alles dik in örde. De lu daor van de organisatie kent oes al een beetie en zie gaven oes een mooi plekkie, zo van gao daor mar staon, dan hej een mooi rustig plekkie.

Het taofeltie en de stoelties gungen hen boeten, de koffiepot derbij, ’t zunnegie scheen en wij vuulden oes de keuning te riek. Helaas, ’t was niet van lange duur, want daor kwam ’t an !

Veer van die jonge bulen in een old vrachtautogie kwammen met een bende bombarie vlakbij oes te staon, der weurden veer stangen in de grond stampt, der kwam een dekklied  overhen, een spuitbus kwam veur de dag en daormet weurden der van allerhande teksten zoas ’fuck you’ en al zo wat meer op dat dekklied speuten. Kratten bier weurden oetladen en oet grote luudsprekers klunk al rap het ientonige bonke, bonke,bonk, ofwisseld met kerstfeestliedties zoas gloria in excelsis Deo.

 

Ik zee tegen Geert : ’Daor biw dus mooi klaor met, wat een rötjongen en wat een stellegie schorriemorrie, het kan mij niks schelen, ik zeg der wat van !’

Mar Geert zee: ’Dat doej dus mooi niet, want zie hebt je niks in de reken’.

Dus, ik huul mij koest, mar wij hadden ’t nog lange niet had, want toen wij met Bink een eindtie gungen lopen, toen gung dat spul liggen te rollebollen over de grond van ’t lachen bij de aanblik van Binkie zien klingelekloties. Non, dat gung ien keer goed en de twiede keer ok nog, mar ja, de daarde keer is scheepsrecht en ikke der hen met zoas altied Binkie in mien kielzog. En toen ontstun het volgende gesprek, ik preut Nederlaands, want ja, aans dan mus ik mien Drèents ok nog weer verdedigen en daor stun mien kop niet naor.

 

De jongelu keken mij vol verwachting an, klaor um in de tegenanval te gaon !

Mar ik har mijzölf goed in de haand en vreug hiel rustig waoras ze toch wal niet zó hard um mussen lachen.Toen zee ien van die jonkies met zu’n hoog piepstemmegie: ’Mevrouw, we lachen niet om u hoor, maar om uw hond’. Ik zee : ‘Dat maakt geen verschil, want wie aan mijn hond komt, die komt aan mij, dus zeg nu maar gewoon waarom jullie zo lachen’. En ja heur, ’t hoge woord kwam der oet : ‘Mevrouw, die hond van u heb van die grote balle !’ Algemeen beschaafd Nederlands ! Brrr……

En toen zee ik : Nou, kijk dan maar eens even heel erg goed, want als jullie later net zo oud zijn als dit hondje, dan is alles slap geworden en gaan hangen en dan ziet het er bij jullie ook zo uit. En wa’k agil niet verwacht har, gebeurde…..dat jonkie met dat piepstemmegie dee nog een poging um in lachen oet te barsten, maar ien van de aandern snoerde hum de mond en zee: ’Mevrouw, u hebt groot gelijk, wij zullen het niet meer doen, laat dat maar aan mij over. En, wat is het eigenlijk een leuk beest ! En hoe heet ie en mag ’t ie een stukje worst ?

Wij hebt gien last meer van ze had ! Ja, zie hebt vanzölf nog wal feest vierd en gien klein beetie ok, zie slupen tusken de ofgekleuven karbonadebotties en lege bierblikkies in. Mar ach, ij moet niet op alle slakken zolt leggen ! Ik vun natuurlijk da’k wal een medaille verdiend har, maar later toen de berichten van Haren en van oes jeugdgebouw binnenkwammen, besefte ik dat die medaille wal ies een hiel aandere keerzijde har kunnen kriegen.

Veur ’t zölfde geld was de vlam in de pan slagen !

 

En dat alles um de klingelekloties van oeze Bink !

 

Zoeken in de site

Willekeurige foto