Artikel
Een gevulige tik over de neus !

Het is een traditie, de meertmaond is de streektaolmaond.

Der wordt dan deur het Huus van de Taol in samenwarking met bibliotheken en ok met schoelen van alles en nog wat op poten zet.

 

Zo was der veurige week dunderdagaovend in de bieb in Emmen het Drèents dictee.

Dit keer hadden ze bedacht um drie Drèentse gemienten tegen mekaar te laoten strieden in groepies van veer. An mij de eer um diel te nimmen bij de groep van Coevern.

RTV Emmen zund het rechtstreeks oet, mar bij oes in Zweel kun wij die zender niet ontvangen en daor was ik achterof bekeken agil niet rouwig um.

 

Ik dacht da ’k der niks bij har, ’t was veur mij ja mar even bijgaon !

Ik zat der dan ok zo van, dat doe ’k wal evenpies in ’n fielekwint (in een handomdraai), een kind kan de was doen, mar ja, aj boven de koestal oet wult gruien dan kom ij in ’t zwienhok terecht (hoogmoed komp veur de val). Komp nog bij, da ’k in de loop van de tied best al een beetie wies um de neus worden bin, want ja, hoe meer aj een kat over de rugge striekt, hoe steiler strek e zien staart. Toen het dictee naokeken was en het aantal fouten van elke dielnimmer bekend maakt wuur, kwam ’Derkje de Groot 9 fouten’ as een mokerslag bij mij binnen, ik schrök mij dood en stun geliek weer met beide bienen op de grond. Ik har der veuls te makkelk over dacht !

 

Kiek, aj niet weet dat Hunebedbouwers met ’n heufdletter möt en aj niet weet hoe aj Noordwest-Europese Leegvlakte schrieven moet, ach……..mar aj  ’an’ moet schrieven en ij schrieft  ‘aan’, of aj  ’met’ moet schrieven en ij schrieft  ’net’, dan zuj toch haost zeggen, daj under de gaanzen oetbröd bint. En ja, ik kwam natuurlijk wal oet veur de gemiente Coevern, maar ik bin niet in de gaanzenstad geboren, dus dat gezegde giet veur mij niet op.

De vrouw die ik veurig jaor nog wus te verslaon, gung non met mar veer fouten met de eerste pries strieken. Ik huul mij natuurlijk hiel groot, zo van der bint argere dingen en volgend jaor beter en al zo wat meer, mar toch………

 

Non ja, ’t is niet aans, eerlijk is eerlijk, die vrouw Jenny Lambers-Niers was mij dit keer dik de baos. Ik maak een diepe buging veur heur!

Van de gemienten was Börger/Odoorn de grote winnaar en die gungen dan ok met de taart an de haal.

 

‘k Was ok agil niet scharp en totaal niet bij de les. Het risseltaot was er dan ok naor, hiele knullige fouten, zeker veer dervan waren niet neudig west.

Mar ja, vanachtern kiek ij ’n koe in ’t gat !!

 

Zoeken in de site

Willekeurige foto