Artikel
Babbelegoegies

Nog een gelukkig neijaor! Wij bint de bocht weerum! Het lèeste stukkie vuul agil nog niet zoveul met. Het liekt wal asof de vuurwarkgekte ieder jaor arger wordt. Ik klaag niet en ik bel ok niet hen de plietsie, want ien dag in ´t jaor, dat overleef ik wal. Ik gun elkenien een pleziertie en ok wal twie plezierties, mar aj een hond hebt die der bang veur is, dan hej gien mooie dagen.

Dat is ofzien, want het arme siepie trilt as een blad an de boom, kröp aal vort en pist en poept overal waor e niet pissen en poepen möt. Gelukkig much e oldjaorsnacht um twaalf uur gewoon bij de buren hen binnen um ze ´t neie jaor of te wensen en daor hef e zuch keurig gedragen, was al lang bliede dat e niet allennig in hoes huufde te blieven.

En zo is der weer een jaor veurbij vleugen, 't giet hard! Wij hebt veul mooie reizen met de camper maakt en hiel veul fietst. En wat heb wij een koppel plezier van oeze elektrische fiets! Wij zet de camper waorens hen en dan stap wij op de fiets, ij komt veul gauwer een einde vort as vrogger op de gewone fiets. IJ wordt ok agil niet meer zo mu en ij ziet veul meer.

Ach, der was vanzölf ok weer veul narigheid, zoas het stikstofprobleem, boeren op onstuur,de bouwsector op de barricaden en gao zo mar deur. Ik begriep 't wal, mar kan der weinig an veraandern. 't Bint ok ja zukke grote problemen!

Waor ik wal wat an doen kan, dat bint de dinger die wat dichter bij mij staot. Zo bin ik overstapt! Nee, niet van Essent naor Nuon of aansum maar van het koor hier op ´t dörp naor het koor in Slien. ´t Was even deurbieten, mar oeteindelijk vernim ij der  niks meer van, alles giet gewoon deur. Zo ziej mar weer dat gieniene onmisbaar is, ok al heb ik lange tied mien hiele ziel en zaligheid in de Loozangers stopt. Een pen met inscriptie is alles wa'k der an over holden heb.

Samen met een vriendin die ok overstapt is, zit ik non bij Pur Sang in Slien, het dörp waor ik geboren en opgruid bin en waor veul mèensken mij kend hebt en nog kent as Derkie Börgers oet de Binnenweg. En of dat non positief is of negatief, ik zul 't niet weten, maar ien ding weet ik wal, wij waren hartstikke welkom!!

Het niveau in Slien lig een beetie hoger dan dat wij wend waren, mar wij mugt een maond snuffeln um te kieken hoe 't oes bevalt.

't Komp vast goed!

Oes Eig'n Kraantien d.d. 4 februari 2020

 

 

Zoeken in de site

Willekeurige foto