.

.

 

.

Babbelegoegies

Op weg naor het neie normaal. Hej dat non ok? IJ gaot er met hen berre en ij stao er met weerop. Der is gien ontkommen an! Wij zit in een intelligente lockdown, zo nuumt ze dat.

Het liekt wal asof wij in ien of aandere horrorfilm beland bint! Op boeten komp de natuur tot leven, alles giet gruien en bluien, mar wij moet zoveul meugelijk in hoes blieven umdat er een onzichtbaar monster (Corona) dood en verdarf zeit under de meènsken.

Gelukkig bint er een hiele koppel deskundigen, die van alles bedacht hebt um de schade te beperken. Zoveul meugelijk ofstand van mekaar holden, zeker anderhalve meter en hiel veul handen waskern.

Bosschuppen doen mag, oeteinlijk moej je an 't eten holden. Het liekt de goeie kaant wat op te gaon, mar ik heb begrepen daw der nog lang niet bint en daw met mekaar moet wennen an het neie normaal, want ok al wordt de regels versoepeld, die anderhalve meter zal nog lang blieven bestaon.

Daor kuj 't wal Spaans benauwd van kriegen, aj denkt daj van alles en nog wat niet meer kunt, zoas even lekker snaaien in de winkels, of tennissen, of iene een dikke smok geven as e jaorig is of gewoon zomar aj daor zin in hebt.

Veul vergaderingen gaot over en de vrijwilligers van 't zwembad en van 't voetbalveld zit in hoes bij de vrouw en ziet mekaar niet, de vrouwlu kunt niet hen de bijienkomsten van de Vrouwen van Nu en ij kunt niet hen zingen aj bij 'n koor zit, mar goed, ik jeuzel zölf wal wat as ik boeten bin en achter 't hoes de was ophang. Mien buurman vindt dat agil niet slim! Hie zee lèest nog dat e der niks van verstiet, mar da'k der gewoon met deur moe gaon.

Wij moet preberen um niet in de stress raken, daor wordt 't alennig mar slimmer van, gewoon je gezonde verstand gebroeken, daor koj 't verste met!!

Een lange wandeling of fietstocht maken kan best nog wal, aj mar niet snötterig bint of aj 't in de hals hebt of koorts hebt of zo. De campings hier in Drenthe bint ok lös, dus daor kuj ok hen, aans huuft ze ok niet lös te weden, liekt mij. Wal ofstand holden, dat sprek vanzölf!! IJ kunt gien gebroek maken van de wc's en de douches, mar daor kuj wal wat op bedenken. Niet in de bossies heur, dat bedoel ik niet! Dan kriej 't met de plietsie an de stok, want dat het wildpoepen en daor staot hoge boetes op!! Een chemisch toilet, dat is waj hebben moet, ok wal potti potti nuumd, kuj bij kampeerwinkels zó kopen.

Der kan en mag hiel veul niet, mar......der huuf ok evenpies hiel veul niet!

Dus, wat let je, gao lekker in 't zunnegie op boeten zitten te lezen, of binnen as 't gien mooi weer is, Hollander adverteerde op facebook met mooie boeken, veur 't geval daj je verveelt. Verwen jezölf met een overheerlijk softijsie van Daan, oeze Coop hef alles waj neudig hebt, de Welkoop hef prachtige bloempies um je tuun en as 't neudig is je humeur op te fleuren en gao zo mar deur. Ik gao niet alles bij langs, mar de middenstand kan wal een steuntie in de rug gebroeken.

Dus: maak van de nood een deugd!

Oes Eig'n Kraantien d.d. 12 mei 2020

Plaats reactie

De redactie behoudt zich het recht voor, ingezonden reacties niet te publiceren, indien de redactie meent dat deze reactie onnodig kwetsend is, of beledigende inhoud bevat.

Informatie

Zweeloo-digitaal is een initiatief van en voor inwoners uit de regio Zweeloo en omstreken en voor iedereen die interesse heeft in de regio. Het is een niet-commerciële website. Als u aanvullingen, tips of journalistieke inbreng heeft ontvangen wij die graag. Wij kunnen onze website daar weer mee verbeteren.
Rechts hiervan kunt u het Contactformulier openen.

DB Sweel