Allereerst wil ik Grietje Hollander van harte fieliesteren! Ik bladerde deur `t kraantien en ik dacht: kiek toch ies an, wat een prachtige foto en wat een prestatie, 25 jaor bij `t koor! Grietje wicht, geweldig, eerlijkse waor, dat doe`k je niet nao! `t Har eigenlijk wal een plekkie op de veurpagina verdiend, mar ja, daor stunden Cees en Lientje Scheper al, die waren 60 jaor trouwd en ja, eerlijk is eerlijk, da`s nog een veul grotere prestatie.

Hoe hebt ze `t veur mekaar kregen! Makkelk zat, gewoon een goeie balans, da`s `t hiele eiereten! Pa verdient de kost en moe zörgt veur de kinder. Het was een aandere tied en oet mekaar gaon, kwam haost niet veur, kun ok niet, want de vrouw har zölf gien inkommen, was ofhankelijk van de man. Tja, der is gien mooi of der is wal een mal bij! Cees en Lientje hebt daor bliekbaar gien enkel prebleem met had, zie bint nao zun lange tied nog hiel wies met mekaar. Dat kuj zó zien!!

Twieverdieners
Tegenwoordig hej twieverdieners, de hypotheek möt betaald worden, twie auto`s veur de deur, drie of veer weken zommervekaansie en geern ok nog hen de wintersport. Wie zal dat betalen, zoete me lieve Gerritje?? Oppas zuken veur de kinder as de de misters en de juffen weer ies staakt en wel brengt ze hen schoel en wel haalt ze weer op, zwemles, gimmestiek enz, enz...De goeie balans is vandaag en de dag ver te zuken, stress, stress en nog ies stress, niet bevörderlijk veur de relatie!

Jans Vos oet Möppen
Ja, zo zet dat eigen kraantie je smangs an `t denken, der stiet altied van alles in, de horeca timmert flink an de weg met reclame, zo is een patattie van Daan nog steeds niet te verslaan en bij zien kraom stiet een bord an de straat waorop stiet: tot hier en niet verder! Hie duurt wal!!

Tienus Evenhoes is al 25 jaor makelaar, in Tante Sweel kuj ien keer in de maond hen de film, der is een rubriek babbelegoegies van ien of aandere praotiesverkoper en körsdaags zag ik  Jans Vos oet Möppen met de börgemister op de veurpagina staon. Jans is zo zachiesan wereldberoemd in dizze umgeving, niet allent um zien lidmaotschap bij de bijenclub, mar ok um zien fluitie!  En altied gekheid, zoas: wat is een potverdommegie? Een vlinderstrikkie!!

Ik beschouw Jans al jaoren as mien grote kameraod, of e dat non wil of niet!

Lanteernpaolen
En der stun ok een foto in van de leden van DBS. Mooi toch? Goed dat er mèensken bint die de belangen van het dörp in de gaten holdt, jammer dat `t zo lang duurd hef eer de lanteernpaolen in De Kloosterdwarsweg en die an `t Klooster weer klaor waren. `t Was lange tied stikkedonker!!

Slim gevaorlijk ok aj je hondtie nog even oet moet laoten veurdaj hen berre gaot.

Ik heb wal ies heurd, dat er welkenden bint die zegt dat ze Oes Eig`n Kraantien haost nooit leest en dat `t vaak geliek bij `t old pepier terecht komp. Ik geleuf der niks van, want....as puntie bij paoltie komp...staot de mieste mèensken geliek op de achterste bienen, as `t een keer wat an de late kaant is! En veural as ze der zölf instaot!!

Ik bin slim wies met OEK!!

Oes Eig'n Kraantien d.d. 17 maart 2020