Artikel
Babbelegoegies

Een beetie van alles en nog wat…………….. Wij bint pas weer een toertie vort west, samen met aans nog welkenden biw hen de Moezel west. Oeze hondties waren ok met.

Flip de teckel en Bram de pittbull pekinees. Ja, dat lees ij goed, oes Bram is een hiele kwaoie! Hie pakt Flip geregeld een keer under, mar die gef der al niks meer um, wet niet aans meer. Toen wij hum net hadden, waren wij der glad even verlegen met, het leek wal asof e veur de duvel niet bang was en as hum wat niet bevuul, dan gun e bieten.

Non ja, klein beetie mar heur, mar toch..!! Hie hung geregeld bij mèensken an de boksepiepen en hie prebeerde mèensken de veters oet de schoenen te trekken, was gien land met te bezeilen! Mar opiens dachten wij, wel is baos, dat kleine siepie of wij??

't Möt toch niet gekker worden!!!

Wij bint hiel opvoedkundig met hum in de weer west en het risseltaat mag er weden, ij kent hum niet weer! Het is een hiel best hondtie worden, non ja, smangs dan nimt e Flip nog wal ies te grazen en hie bet ok nog wal ies een beetie, mar over ‘t algemien hew niks te klagen!

Gehielontholders
Waor was ik ok al weer bleven...oh ja, wij waren hen de Moezel, het gung oes niet um de wien, want wij bint gehielontholders, nee, wij wolden fietsen deur de mooie natuur. En dat is prima lukt! De coronaregels waren niet veul aans as hier, behalve aj hen de winkel gungen, dan mussen ij een snoetschoetie veur doen. In Duutsland nuumt ze het een masker, klinkt veul onaangenamer vin ik, bah! Mar wij waren der zó an wend, het schoetie of masker, hoe aj 't maar numen wilt, hadden wij miestal in de kontbuus van de boks, as wij dan argens hen binnen mussen, dan kun dat. Toen wij weer in Nederland waren, greep ik nog aal naor mien kontbuus!

Hej dat lezen van Jan Germs?
Hie zeg dat Drèents praoten een vörm van riekdom is.

Dus daor komp de aap oet de mouw! Ik vuulde mij altied al een beetie verheven boven mèensken die waorens aans vort komt, dus daorum loop ik altied zo met de neus in de lucht! Hej 't wal deur?

Gien spat veraanderd
Ach, ik zag dat Egbert Nijenbanning op de veurpagina van OEK stun, 56 jaor zingen bij de Loozangers, da's um de drommel gien kattepis! Ik har hum lang niet meer zien, mar hie is gien spat veraanderd. Ik heb nog met hum in ‘t bestuur zeten toen ik der nog bij heurde, hij was toen veurzitter en wij akkedeerden best met mekaar. Hie tonterde wal ies wat, mar Ik much hum altied geern.

Begunt te rippeteren
Ik heb van iene heurd, dat het koor binnenkört weer begunt te rippeteren. Dat möt ok, want deur corona hef de boel veuls te lang stil legen. Der is non besleuten um de rippetities op te splitsen, veur de pauze de sopranen en de tenoren en nao de pauze de alten en de bassen, of aansum. Zingen is een kwestie van goed naor mekaar luustern en die anderhalve meter ofstand van mekaar maakt het er niet makkelker op. Der is ooit een dirigent bij 't koor west, die altied zee:

Zingen, dat doej met je oren!!

Oes Eig'n Kraantien d.d. 15 september 2020


 

 

Zoeken in de site

Willekeurige foto