Artikel
nr. 10

Wat denk ij, wat dat kleine jonkie op die foto hierboven döt ?

Dat za’k je vertellen.

Hie verveelde zuk en zat gigantisch te mekkern.

En toen zee ik : ”Gao mar op kop staon en dubbelties schieten”. Non, dat was niet tegen dovemans oren zegd. Aj goed kiekt, dan ziej ze der stuk veur stuk oet kommen, deur ’n klein gattie in zien boksie.

Der bint zu’n koppel mooie Drèentse gezegdes, dat har mij wal wat leken um der met ’t kommende Zudenveldtoonstelling wat met te doen, mar wij hebt bij oes in de straot argens aans veur keuzen. Ok hiel mooi heur, mar ik vertel je der lekker niks over.

 

Bi’j wal wies, dat is streng geheim ! Mar mooi dat ’t wordt  !!! IJ kiekt je volgend zommer d’ogen oet de kop !

 

Kuj je der ok zo op verheugen op die toonstelling ?

Of hej der niks met ?

Ach, ’t komp vanzölf, nim dat mar van mij an. As ’t dolkies zo wied is en alles reur komp, dan is der gien holden meer an. De bevolking van Zweel en umstreken komp massaal reur veur ”HET GROTE  FEEST ”. Het dörp möt een volledige metamorfose undergaon.

De tuunties wordt onkruudvrij maakt, hier en daor wordt er op de valreep nog een nei straotie legd en mienigien hanteert vol overgave de varfkwast. Een nei likkie varf op de kezienen döt wondern. Alles möt er spic en span bijliggen ! Da’s altied al zo west.

Ik ken zölfs welkenden, die veurig zommer erpel veur de glazen verbouwd hebt. Ik geleuf, dat dat goed veur de grond is. As dan de erpel der oet bint en ij zeit weer gres dan hej ’t jaor derop een gazonnegie um deur ’n ringie te halen.

En loos is ’t ok, want zie slaot twie vliegen in ien klap : lekkere erpel oet iegen tuun en tiedens de toonstelling een hoekie gres um U tegen te zeggen.

Vrogger in Noord-Slien, as de wagen versierd mus worden argens bij ien of aandere boer op de deel, dan stuurden de grote mèensken oes kinder geregeld um de balkenscheer. Dan lupen wij ze helderweg een toertien niet in de weg, want wij kunden overal vraogen, maar wij vunden nargens een balkenscheer. Simpelweg, umdat zu’n ding agil niet bestun. Zie hadden oes gewoon wat op de nak dreid.

En um weer terug te kommen bij de Drèentse gezegdes, as de Zudenveldkoorts demee in volle hevigheid lösbarst, dan huuf ’t je niks te verwondern, dat zölfs mèensken, die niet zo goed met mekaar akkedeert, zo mar weer hiel goed in ien pottie kunt pissen.

Ziezo, Binkie begunt op te speulen, hie wul hen boeten !

Hie möt de sik verstikken !!

 

Zoeken in de site

Willekeurige foto