Brrrrr…….’t Is vandaag de zesentwintigste juni en ’t is kold en nat op boeten.
’t Liekt wal harfst inplaots van zommer.
Aj dit stukkie leest, dan bin wij vort.
Jan Roep giet op vekaansie en wij wilt niet achterblieven.
Ik hoop dat ’t weer wat opknapt, want zo is ’t niks. Een graodtie of veerentwintig met ’n zunnegie derbij zul niet gek weden. Hieter huuf van mij niet. In Turkije en zo is ’t op dit moment bloedhiet en da’s ok niks.
De musken valt er dood van ’t dak !
De familie Teckel is veurige week al vort gaon. Ik hoop dat ze niet verzeupen bint, want daor is agil niet veul regen veur neudig. Met die körte pooties valt ’t niet met um de kop boven water te holden. Eer daj der op verdacht bint, gaot ze koppie-under ! Mar goed, ik heb nog gien SOS bericht ontvangen, dus zie zult heur wal vernuvern.
Bi’j zaoterdagaovend ok hen Wisp west ? Nee ? Dan hej wat mist !
Der was daor een literatuurfestival. Ongeveer op dezölfde menier as de jaorlijkse kersmarkt, mar dan aans. Dit was met schrievers en zo, mar dat haj zeker al in de gaten. Mooi zo, dan huuj ’t in de bulten niet te zuken !
Oeps…wat slao’k weer ’n taol oet hè ?
Non, dan haj die Erik Hartevelt moeten heuren ! Wat een knien ! Die is pas grof in de bek, daor bin ik niks bij ! Hie har ’t over dikke poesten en kalknagels en tandplak en stinken oet de bek en gao mar deur. Hoe maller, hoe mooier !
Non vraog ij je zeker of hoe dat hondtie dat aal wet, mar ik bin der hen west heur. Hej mij niet zien ? Ik stun met de neur veuran. Echt waor !
’t Waren zinderende zommerzinnen.
En wat zag mien oog körsdaags ?
Joris van oeze domnee wordt ’n daggie older. Hie hef ’n angepast vervoermiddel kregen inclusief chauffeur. ’t Is mooi dat zukke dinger der bint, dan kan e toch nog argens hen.
’t Vrouwgien en ik hebt net oes eigen kraantie evenpies deurbladerd.
’t Wordt dunkt mij diep triest op de Zweeler markt. Da’s niet zo mooi !
Zweel bliekt in de ban te weden van kunstenaars en ankommen wonsdag wordt ’t old pepier weer ophaald.
Het openluchtspel bestun vieftig jaor en vrouw van Veen oet Aalden gung met ’n dikke pries strieken. Ze kan de portemonnee veurtaan altied in hoes laoten as ze naor een veurstelling wil. Albert Kuipers ( Kupers zegt de Drenten ) much heur de pries geven en daor har e dunkt mij de mouwen veur opstreupt. Of har e blote mouwen ? Mag ok !
ZBC kan ok evenpies weer veuroet, want zie hebt een paar goede geldschieters vunden. Geld stinkt, mar elkenien is der gek op !
Der bint mèensken die zegt dat de letters ZBC staot veur Zweeler bollenclub.
En dan bedoelt ze gien siepels of zo, mar stieren. En da´s hartstikke flauw !
Net zo, as dat ze zegt dat BOM stiet veur ´bewust ongehuwde moeder´, want da´s hiel wat aans. Oh ja, die lèeste gef ankommen zaoterdag ´n oetvoering samen met HEM. Stun ok in oes eigen kraantie !
En de kroeg hier op dörp giet ok weer lös under een neie naam.
As wij der weer bint van vekaansie, dan moew der mar ies ´n borrel halen.
Dan bel wij Tante Sweel eerst evenpies op um te zeggen daw underweg bint.
Schat, staat de Bokma koud = Prettige vekaansie ! Woef !
