Oe...oe…oe…oerend hard, kwammen zie daor angescheurd, oe…oe…oe…oerend hard, want zie hadden van de motorcross geheurd……
Wij bint hen de motorcross grandprix west !
’t Valt um de drommel niet met heur aj Binkie bint, want zie sleept mij overal met hen.
’t Was ’n heksenketel !
Ik wus niet wat mij angung. Heuren en zien vergung je !
Brullende moters, oetlaotgassen en overal hung de lucht van patat en hamburgers en zo. ’t Was net wildwest ! ’t Baosien was glad deur ’t dolle hen, hie was niet van de baan weg te braanden. Hie kwam smangs nog evenpies een plakkien stoet halen, mar dan haj ’t ok net had. Non, ik en ’t vrouwgien hadden ’t rap bekeken, dat kan ’k je wal vertellen. Wij hebt lekker wat kuierd en ’n beetien in ’t zunnegien zeten en zo.
Wij hebt oes ok best wal vernuverd.
Hej dat stukkien in de kraant ok lezen over die vliegen en die muggen ?
Bij oes in Drente zegt ze tegen die lèesten ja neefies.
Weej wal hoe dat komp ?
Non, pas op, dat hef der met te maken, dat dat smerige goed ’s nachts bij je op berre komp en dan bloed bij je oftapt. En zo wordt ze dus bloedverwanten van je.
Vandaor het woord ’neefie’. Begriep ij wal ?
En aj dan ’s mörgens wakker wordt, dan zit ij under de jokbulten en dan doej niks as schobben.Tja, van je femilie moej ’t mar hebben !
Daar bij die molen, die mooie molen……….
Körsdaags bin ik en ’t vrouwgien op ’n mooie zundagmiddag hen de meul west.
Daor was van alles en nog wat te doen. ’t Weer warkte met en under ’t genot van ’n bakkie leut heb wij mooi keken naor de festiviteiten, zoas ’t Shantykoor en de Drèentse schriever Jan Germs. ’t Vrouwgien zat mooi op ’n stoeltien en ik lag achter heur bij vrouw Nijenbanning oet Aalden op de voeten, lekker in de schaduw.
Dat much best, ondaks het feit, dat ze nogal lochtig goed an har.
Ja, smangs weej ’t mar nooit, want ik heb nogal ’n roege bos zwart haor.
As ik samen met de femilie Teckel an ’t pad bin, dan bint der haost altied wal welkenden, die zegt : ’Oh, wat bint dat ja mooie gladde hondties’ !!
Blah…blah….blah….!!!
En ikke dan ?
Bin ik dan niet mooi ?
Tuurlijk wal !
Echte schoonheid zit van binnen !!!!!!!! Woef !
