Wat hew ’n malle tied achter de rugge hè ?
Is ’t niet bedroefd, die moord op Theo van Gogh ?
En kört daorop gungen der op nog iens schoelen en moskees in de fik.
Wat leef wij toch in ’n beroerde wereld hè ? Non ja, de wereld hef natuurlijk gien schuld, ’t bint de mèensken, die ’t doet.
Iene um ’t leven brengen, dat mag vanzölf nooit, mar al dat gesoes over het recht op vrije mieningsoeting, dat giet mij smangs ok wal iens ’n beetien boven de pet.
’t Vrouwgien zeg, dat dat betiekent, daj alles zeggen mugt waj mar wult.
Non, ik vin ’t mar raar. IJ huuft er toch zekers niet alles oet te kraomen wat je veur de bek komp ? Wal dan ? En, hoe zit ’t dan met dat gezegde ”Spreken is zulver, mar zwiegen is gold”?
’k Wol mar zeggen, een aander zo veur de kop stoten, da’s toch nargens veur neudig. Daor komp allennig mar ellende van, dat hej non ja wal weer zien.
Ik en ’t vrouwgien hadden ’t er mar drok met, totdat ’t baosien zee : ”Hol der mar over op, want ij kriegt hum der niet met weer”. Non ja, hie hef wal geliek, mar daor giet ’t oes ok niet um. Ach, wij bint mar simpele zielen en dus is ’t mar beter, daw ’t an de hoge heren overlaot en dan zuw mar hopen, dat die de doppen goed lösholdt.
Aander underwarp dan mar.
Veur da’k wieder gao, wu’k ’t volgende nog evenpies kwiet : as ik smangs wat grof in de bek bin, of as ik der iene een strieker van langs geef, dan moej niet bij ’t vrouwgien weden heur. Die kan ’t echt niet helpen.
IJ moet bij mij weden en ik biet wal van mij of. ’k Bin per slot van reken een hond.
Ik en ’t vrouwgien hebt er al hiel wat anof kuierd. ’t Begunde met kleine eindties, zoas beveurbeeld bij Dubbelhoes ’t fietspadtien umhoog en ik meeg daor vrolijk tegen de buxessen an.
Oeps.....daor dobberde Berend op de roet. Hie was agil niet slim wies met mij.
Mar hie har groot geliek heur, dan weet wij dat en dan kuw der reken met holden.
Ienmaol weer in hoes hef ’t vrouwgien mij evenpies under handen nummen, ze zee :
”Denk erum Bink, ik wul um je gien gestront met de buren”
’t Komp dik veur mekaar, want ik bin een slim loos hondtien.
Woef !!!!!!!!
