Toen ’t vrouwgien veurige week dinsdag op de zang kwam, toen waren der
’n paar dames, die trakteerden op ”beschuit met muisjes”.
Fennie en Annemarie waren allebei veur de twiede keer opoe worden.
Non ja, opoe ? Dat is al lang oet de tied, vandaag en de dag het dat ”oma”.
Dat klinkt natuurlijk ok veul beter. Trouwens, dat woord is nogal iens an veraandering underhevig west heur, want mien vrouwgien hef hiel vrogger nog ’n otien had. Hoe zul dat toch kommen, dat ’t bij de vrouwlu zo vaak aans is gaon hieten en bij de mannen niet. Ik denk dat ik ’t wal deurheb, vrouwlu bint non ienmaol net zo veraanderlijk as ’t weer, wat ik je brom !
De dames, waoras ’t in dit geval over giet, waren hartstikke bliede met de neie kleinkinder. Het waren allebei jonkies, dus dat scheelde, want toen waren ze klaor met allennig mar blauwe ”muisjes”. Ja, en non bint die kinderties die der al waren dus in ”t enterhokkien” kommen. Da’s agil niet slim heur, ’t is juust hiel goed, want dan leert ze um reken te holden met aandern en dat ze moet dielen. En as ze ’t niet mooi vindt, dan laot ze mar rustig ’n toertien schrieuwen heur, daor kriegt ze starke longen van. Boetendien met ’n ienig kind giet ’t net as met ’n naokommertien.......die wordt stok en stief verwend en dat moej niet hebben, daor hew ’t al iens eerder over had.
’t Vrouwgien hef mij alles in geuren en kleuren verteld, want ik zat natuurlijk weer moederziel allien in hoes. Dat is altieding ’t zölfde liedtien op dinsdagaovend en zu’n beschutien was der bij mij ok wal ingaon.
Mar goed, as ’t dan einlijk zaoterdag is, dan is ’t leed weer leden, want dan heb wij.........Daandag !!!
En dat betiekent.....patat met mayonaise veur de baos en baosin en veur mij
’n pottien roomijs !
Ik vin die Daan wal ’n beetien ’n groothals heur, kiek mar iens naor die reclame van hum : ”Een patatje van Daan is niet te verslaan”.
Wat ’n wiesneus hè ?
Trouwens, aj daor binnen bint in die superdeluxe snackbar van hum, dan moej je ogen iens evenpies goed de kost geven. Daor hangt namelijk prachtige schilderijen met ’n hiele stoere Daan der op en ’n biezunder frivool geklede Roos. Echt waor, ij weet niet wat aj ziet. ’t Is mar goed, dat Roos der niet altied zo bij lop, want dan gungen alle keerls oet Zweel en wiede umgeving massaal elke dag an de patat.
Zeker weten ! Moeder de vrouw bleef dan wal zitten met heur bloemkool met
’n pappien en dan gungen alle aandere patattenten kepot, want daor kwam dan allennig nog mar anderhalf man en ’n peerdekop.
En non mar hopen, dat de volgende week niet opiens alle potties roomijs oetverkocht bint.
Woefff !!!!
