.

.

 

.

Babbelegoegies

Corona en ... het ies kan lieden! Tja, vrolijk worj der niet van, corona hef alles en iederien nog stevig in zien greep, al is der wal hier en daor een piepklein lichtpuntie.

De legere schoel is weer lös, met handhaving van het snötneusbeleid. Dat gef weer wat luchtigheid veur de vaders en de moeders!

En veur een hiele koppel opa`s en oma`s!! En eindelijk wat reurigheid, het was veurige week dik winter en het ies kun lieden!!  De iesbaan kun lös! Luudspreker zingt, de lampen braandt, de scheuvels scharp, mien hart zó licht... Het gedicht van Anne Doornbos kwam tot leven!

Aovendklok
Deur haansken hen vuul ik joen haand.....mar met anderhalvemeter ofstand liekt mij dat knap lastig, van intimiteit kan der dan ok weinig sprake weden en opgelet....veur negen uur in hoes.... want wij zit met een aovendklok!  Da`s non niet bepaald  bevörderlijk veur de romantiek, want ja, wees mar eerlijk, het wordt pas spannend as `t wat later op de aovend is.

Mar ach, aj wat older bint, dan hej `s aovends um negen uur in de winter ok ja niks meer op boeten te zuken en scheuveln kuj ok mar beter an jongere lu over laoten, want aans wordt `t bienen breken. En de romantiek?? Hart van Nederland en dan hen berre!!

Mis ik dan niks?

Wij hebt agil nog niet zoveul te klagen, wij wandelt alle dagen met de hondties, geniet van de natuur, wij doet een beetie bosschuppen, kookt een pottie eten en zo keutelt dat wal wat an. Mis ik dan niks? Zeker wal, het zingen, dat mis ik!

Ik jeuzel altied wal wat in mijzölf, mar het zingen in koorverband, het stevig rippeteren met mekaar um oeteindelijk wat moois te maken van wat waor aj van dachten dat `t veul te moeilijk zul weden, dat mis ik.

Bram
En ik mis ok wal een beetie het geouwehoer der um hen, iene die een goeie mop vertelt en waor aj dan hard um lachen moet, ok al snap ij der niks van! 

Zo zag ik lèest iene die was drok tegen de kat an `t praoten, ik vertelde dat an Bram oeze hond en die mus der ok zò um lachen!! Ha ha, pikt van facebook!! Of eh..wel hef de mieste praoties in de bestekla? Antwoord: de opscheplepel!

Dikke meneer
En dan nog iene um stief over nao te denken: Der lop een dikke meneer met een sigaar in de mond met zien hondtie te kuiern. Dan komp een vrachtauto overbeladen met legoblokkies de bocht um scheuren, maar wonder boven wonder valt er mar ien blokkie of. De dikke meneer en zien hondtie bint haost in hoes en umdat e niet roken mag van de vrouw en under de plak zit, gooit e de sigaar vort.

`t Hondtie der achterheer! En wat denk ij waor `t hondtie oeteindelijk met an kwam zetten???

Dat vertel ik lekker niet. Sliep oet!!!

Oes Eig'n Kraantien d.d. 16 februari 2021

Plaats reactie

De redactie behoudt zich het recht voor, ingezonden reacties niet te publiceren, indien de redactie meent dat deze reactie onnodig kwetsend is, of beledigende inhoud bevat.

Informatie

Zweeloo-digitaal is een initiatief van en voor inwoners uit de regio Zweeloo en omstreken en voor iedereen die interesse heeft in de regio. Het is een niet-commerciële website. Als u aanvullingen, tips of journalistieke inbreng heeft ontvangen wij die graag. Wij kunnen onze website daar weer mee verbeteren.
Rechts hiervan kunt u het Contactformulier openen.

DB Sweel