In wat veur wereld bin wij beland? Smangs zie'k een bus veurbij kommen en a'k dan hen binnen kiek en ik zie al die mèensken zitten met die snoetschoeties, ...
dan denk ik: oh oh, mien va en moe mussen de ogen nog ies lös doen, dan zulden ze toch echt denken dat de wereld totaal gek worden was. Non ja, der is nog nooit iene weerum kommen, mar much dat toch gebeuren, dan denk ik dat ze geliek rechtsumkeert gungen.
Wachten op oetslag
Net op de tillevisie heurd dat de maatregels wat betreft Corona een beetie versoepeld bint. Anderhalve meter ofstand, snoetschoeties en hiel veul handen wassen dat blef. En aj opiens niet meer ruukt dat de boeren an 't stronten bint of as 't eten je niet meer smaakt of aj een snötneus hebt en kold en hiet tegeliek bint umdaj koorts hebt, dan wordt er van je verwacht daj hen testen gaot. Dan pulkt ze wat in je hals en in je neus, smangs moej een beetie kokhalzen en dan wordt 't wachten op de oetslag. As dat positief is, dan moej in hoes blieven, muj nargens meer hen. Gelukkig kuj de bosschuppen online bestellen!
Zwaor depressief
Mar der mugt weer twie mèesken tegeliek bij je op visite kommen en ij mugt ok weer met zien twieën argens op visite gaon. Mar het allerbelangriekste veur sommige mèensken is, dat de terrassen weer open mugt. Da's mar goed ok, want der waren welken zwaor depressief an 't worden en bijna tot zölmoord in staot. Zie mussen massaal in therapie! Wij hebt dat niet neudig, wij gaot gewoon met de camper weg en dan zet wij oes terras daor hen waor de reis oes brengt. Ja, wij bint wat dat betreft beveurrecht!
Slim kold
Ik mag geern even op tjak, even een aandere umgeving. Hen 't boetenland kan niet, want het monster zit overal en de kans op besmetting blef groot. Gelukkig hef Nederland nog mooie plekkies zat!! De eerste keer daw dit jaor vort gungen was in meert. Het was slim kold, een warme pyjama en een kruuk waren gien overbodige luxe! En Bram had ' t ok zó kold, had ok hiel lang met een coronakapsel rond lopen en had ´t haor der net of. En tja..een hond heurt niet in berre, da's bliekbaar bij de wet regeld! Mar regels bint er um je der an te holden of.... um ze te overtreden....en ik kan je wal verzekern dat Bram ´s nachts gien kolde leden hef!!
Posbank (Veluwe).
De twiede keer gungen wij samen met aandern, het was rond Paosken en het was 25 graoden of zo. Wij gungen een wandeling maken op de Posbank (Veluwe). Het was ofzien! Bultie op, bultie of!! As die aandern der niet bij west waren, har Bram de eindstreep niet haald, hie is der overdragen. Ja, elf jaor keer zeuven, reken mar oet! Mar ja, april döt wat e wil, een paar dagen later vleugen de sneivlokken oes um de oren!
Over een toertie gaow weer, hopelijk wordt 't weer dan ok wat beter, zodaw ok fietsen kunt, de accu vol met stroom, Bram achterop en gaan met die banaan!
Wel döt mij wat!!
Oes Eig'n Kraantien d.d. 4 mei 2021
