.

.

 

.

Babbelegoegies

... daor kun wij in Zweel trots op weden! Op oeze Coop!! Oeze winkel in Zweel is veraanderd, wij moet er even an wennen, mar ´t komp vast goed! 

Aj binnenkomt ziej wat neie gezichten, ok achter de kassa, veulal jonge wichter die je vriendelijk te woord staot. "Spaart u zegeltjes voor de pannen? Wilt u het bonnetje mee? Dan wens ik u verder een prettige dag". Niks mis met toch? Ien van die wichter hef léest Bram al anhaald, non, die kan bij mij al niet meer kepot!! Het bint de kleine dinger die het doet.

Een frisse wind …
Tuurlijk mis wij Jankie en Gezienus en Herman, want dat vuulde altied zó vertrouwd, mar oeze Coop is samengaon met Plus en non wordt alles regeld deur Van Hogerhand en die hef er een frisse wind deur hen laoten weien. ´s Mangs möt dat wal ies, alles kan niet altied bij ´t olde blieven, Zie moet met de tied met! En eerlijk is eerlijk, het is een mooie supermarkt worden, met hiel veul neie producten, daor kun wij in Zweel trots op weden! Op oeze Coop!!

Mar ja, der is gien mooi of der is wal een mal bij, sommige dinger waren der opiens niet meer te kriegen. Gelukkig valt daor over te praoten!

Met eigenheimers groot bracht
Een paar kleine veurbeeldties: erpel die ik altied kocht, waren der niet meer.
Sommige méensken pruuft gien verschil tussen eeterpel en voorerpel! In de grote stad maakt méensken zuch daor vast niet drok um, kant en klaor maoltieden en pasta, dat vindt ze daor denk ik belangriek, mar aj met eigenheimers groot bracht bint zoas ik, dan bi'j agil niet bliede met die vrömde erpelmarken.

Begrip
Arjen van de gruunteofdieling har der alle begrip veur en hef de grote baos an de jas trökken. Der lag opiens weer Bildstar (ok goed) in de winkel en ik har ok vraogd waorum der gien kraopen (armoekost zeden ze daor vrogger tegen, mar o zó lekker met speklappies) meer waren. Bint er non ok weer! Die zeun van Jansen heft dat zó veur mij regeld. En de lenzenvloeistof die ik altied gebroek, was der eerst niet, mar non wal, Ik heb even an de bel trökken en 't kwam dik veur mekaar.

Personeel is hiel behulpzaam
Dus beste méensken, niet geliek klagen en stennen, gewoon vraogen. Het personeel is hiel behulpzaam en döt er alles an um de klant as keuning te behandeln.

Munties
Evenpies leek 't erop daw in de toekomst munties mussen gaon gebroeken veur de winkelwagen. Tja, waorum? Dit stun op google: munties bint er veur um je handeling of te maken, kar weer op plek zetten en niet bij de auto of zo achterlaoten. De klik van de ket die in 't kastie van de winkelwagen stopt wordt, is een soort van beloning, de handeling is ofmaakt. In Zweel hew toch zeker gien beloning neudig um de kar weer netties op stee te zetten? Heb hier nog nooit een winkelwagentie rond zien slingern en woon hier toch al een hiele zet. Gelukkig giet dat muntiesgedoe niet deur, leek mij ok niks weerd! Wij komt er met mekaar wal oet, heb er alle vertrouwen in dat oeze Coop het gezellige dörpskarakter beholdt!

En dan nog even dit...oes eigen kraantien hef een groot bereik, tot ver over de previncie grenzen, want in IJmuiden woont de viefenningtig jaorige tante Gé, een groot fan van Babbelegoegies!

Tante Gé, bij dizze de hartelijke groeten vanoet Zweel!!

Oes Eig'n Kraantien d.d. 25 januari 2022

Plaats reactie

De redactie behoudt zich het recht voor, ingezonden reacties niet te publiceren, indien de redactie meent dat deze reactie onnodig kwetsend is, of beledigende inhoud bevat.

Informatie

Zweeloo-digitaal is een initiatief van en voor inwoners uit de regio Zweeloo en omstreken en voor iedereen die interesse heeft in de regio. Het is een niet-commerciële website. Als u aanvullingen, tips of journalistieke inbreng heeft ontvangen wij die graag. Wij kunnen onze website daar weer mee verbeteren.
Rechts hiervan kunt u het Contactformulier openen.

DB Sweel