Grensoverschriedend gedrag. In de jaoren zeuventig hadden wij een transportbedrief met ...
grensoverschriedend vervoer, dat was dudelk, want ij wussen waor de grens lag, tussen Nederland en Duutsland of tussen Nederland en België, ik nuum mar wat. Bij grensoverschriedend gedrag, waor ik toen nog nooit van heurd har, lig dat een stuk lastiger, want ij kunt de grens niet zien of anwiezen, ij moet deksels goed je fetsoensregels in acht nimmen, gien vieze praoties en veural je poten in hoes holden.
Opmarkings zat, mar gien prebleem
Kiek, ik bin non niet meer de jongste en bouwvakkers fluit echt niet meer as ze mij ziet. Mar vrogger was dat wal aans! Ik much der best weden, al zeg ik 't zölf, strak in 't vel en gien grammegie te veul, een strak boksie um de kont, seksy truigie an en gao zo mar deur. Opmarkings zat, mar gien prebleem, ik har der lak an! Mar anraken? Niet zunder toestemming en nee was nee! En die dat niet bergeep kun een drei um de oren kriegen. Ik heb non gien last meer van opdringerig manvolk, dat is west. Mar lèest zee der iene tegen mij dat ik mooi old weur, wal lief, mar schrale troost. Ha ha!
Verhalen die de ronde doet
Alhoewal, van de iene kuj 't beter hebben as van de aander en zolang as 't mar bij praoties blef, valt 't ok wal een beetie met. Mannen zit wat aans in mekaar as vrouwen, denk ik. Ik heb der ok ien in hoes en die kreeg lèest het malle vel een beetie an, waarschijnlijk inspireerd deur al die verhalen die de ronde doet. Wij leupen te kuiern en ik zee da'k 't kold har. Moej naogaon wat e zee, hie zee: kom mar stief tegen mij an, dan maak ik je wal hiet!
't Möt toch niet gekker worden! Weej wal ik zee?
Ik zee: pas ij mar op en zeg dit niet tegen een aander, want dan worj zó oppakt en eer daj 't weet giet je hiele carrière naor de knoppen.
Een oom van mij, ome Gerrit (leeft al lang niet meer) har vrogger altied een mes in de buus, dat hadden toen hiel veul mannen en daormet bedreigd'e dan wal ies kwaojongen die niet umliek wolden: kom hier, za'k je de piel ofsnieden! Was dat ok grensoverschriedend gedrag? Hol toch op! Wij as kinder lachten der um en wij hadden dikke schik. Het was een aandere tied en hiel onschuldig.
Zogenaamde dickpic
Wij hebt non te maken met de zogenaamde dickpic, rondoet smerig en asociaal! Toen ik veur 't eerst van dat fenomeen heurde, dacht ik: wat zuw non weer beleven! Hoe komp iene der bij um zien geslachtsdiel op foto te zetten en te versturen? Is e zó goed bedield, dat e der met pronken wul?
Dat möt haost wal, want wees non eerlijk, aj zu'n klein wörmpie hebt, daor gaoj toch niet met te koop lopen! Ach....een paar centimeter meer of minder... döt er ok niet toe, het verzenden van zu'n dickpic, groot of klein, is echt grensoverschriedend gedrag en möt bestraft worden.
Ome Gerrit har der wal raod met weten!!
Oes Eig'n Kraantien d.d. 1 maart 2022
