De Loozangers bint nog altied springlimtig! De lèeste jaoren was ik niet meer hen een kerstconcert west,
... dat har vanzölfsprekend alles van doen met corona, mar ok met het feit dat ik niet meer zoas vrogger in een koor zing. En ik miste het zó!
Dus, samen met aans nog iene gung ik hen de Korenhof, daor kwammen de Loozangers, een gemengd koor. Daor hol wij van!! Het publiek bestun veurnamelijk oet olden van dagen, mar dat much de pret niet drukken. Daor heur wijzölf ok bij!!
Wat was ´t een groot koor worden, ik keek mij de ogen oet de kop toen ze opkwammen. Ik weet nog hiel goed, dat dat wal ies aans west is!
Gebrek an leden dee het koor bijna de das um. Het toenmalige bestuur hef alle zeilen bij moeten zetten um deur te kunnen. Een neie dirigint, modernere kleding, een vlotter repertoire, veul adverteren um an neie leden te kommen, vrachten eier verkopen met de Paosken enzovoort, het hef dertoe leid dat het koor nao 75 jaor nog bestiet.
De opstelling vun ik een beetie vrömd
Veuran op de eerste rij zag ik mar ien man staon met een klein vrouwgie der naost. Die man was de penningmister, altied drok met op de centies passen, mar hie zung non as tenor de sterren van de hemel en dat vrouwgie was de sikketaresse, die zung vrolijk met hum met, ok de tenorpartij! Der bint mar weinig vrouwen die dat kunt en durft!
Dus klein mar dapper! Mar ... waor waren de aandere mannen? Het leek wal asof ze allemaol wegverkrupertie deden!!
Vervolgens nog even wat goedbedoelde kritiek:
De kleding was arg netties, een beetie stief, har wat nonchalanter mucht en de zangers mugt best wat meer laoten zien dat ze plezier beleeft an het zingen! Bij de miesten kun der gien lachie of, dat vun ik jammer. Jammer ok van Santo, daor hadden ze eigenlijk een solootje tegen an moeten gooien!
Het concert was kört mar krachtig, de liedties waren mooi en weurden ok mooi zungen! De keuze van de metzingnummers was perfect, niet te moeilijk, het publiek zung oet volle börst: Ding dong, ding dong bell!
Mu en voldaon kunden wij oldegies gewoon op tied hen berre en kun ik rustig slaopen:
Het giet goed met De Loozangers!
Oes Eig'n Kraantien
