.

.

 

.

Babbelegoegies: Het witte jassen syndroom en geboefte!

Wat ik non toch weer beleefd heb! Ik mus hen de dokter en ik heb dus het "witte jassen" syndroom, ...

doej niks an, as ik de drempel bij de dokter overstap, dan vlög mien bloeddruk as een speer umhoog.

Het was dit keer niet aans, de assistente har agil gien witte jas an en toch was de  bovendruk zörgwekkend hoog, underdruk bin'k glad vergeten deur de consternatie.
Dus kastie an, veerentwintig uur, mal ding, pomt zowal overdag as ´s nachts een aantal keren op en holdt je aj op berre ligt dus mooi oet de slaop, umdaj der op liggen gaot. Ik was best wat van slag, zag de bui al hangen, weer een pillegie der bij!

Zo giet dat bij de miesten aj older wordt! 
Mar daor wuj vanzölf gien woord veur hebben, wij ok niet en  dus gaow met de auto hen de dokter aw weer een vrachie op moet halen. En dan te bedenken daw haost naost de dokterspraktijk woont!

Mar goed, dat was nog niet alles, want wat er toen gebeurde, gung later as een lopend vuurtie deur `t dörp en weur aal spannender!

Met mien kastie an op weg hen hoes zag ik bij de bushalte tegenover oes hoes een bus staon en ok een ziekenwagen.
Non ja, der gebeurt wal ies vaker wat, dus ik meuk mij der nog niet al te drok um. Mar bliksiekater, ienmaol in hoes zag ik dat er ok een plietsieauto bij kwam. Ik dacht: wat zuw non beleven!!

Dus, ik gung mooi zitten te koekeloeren in `t hoekie van de bank: Ik zag de deuren van de ziekenauto lös gaon en ik zag ok dat de plietsie stun te weisteren naor iene die der bliekbaar in zat en der oet mus kommen. Het duurde een toertie, mar oeteindelijk kwam der een ventie oet, kun der niet alles van maken, mar zag wal dat der wat niet deugde, het leek een vrömde snuiter.

Der weur nog wat praot en haandties schud en plietsie gung vort, bus ok en ziekenwagen ok. 
Ventie bleef met de ziel under de arm staon, mar begun al rap an de fietsen te trekken um te kieken of der ok iene van slot stun. Der gung van alles deur mij hen! Ik dacht: ik moe de plietsie bellen, mar ja plietsie was nèt weg! Mar toen opiens kreeg ik `t slim drok met observeren, want het ventie stak de straot over, prebeerde over de umheining tussen de straot en het lappie gresland veur oes hoes te klimmen, kwam vast te zitten, belandde met de snufferd in het gres, mar kwam oeteindelijk toch an de aandere kaant. Bliksiekater, Ik zag hum recht op mij of kommen!!

Oh gottegot, ik as de gezwinde weerlicht hen `t achterhoes en alle deuren op slot!!
Ik wus niet of de buren in hoes waren, mar ik duurde der ok niet meer oet! Dus toen mar hiel veurzichtig um `t hoekie van `t raam kieken. Niks te zien! Mar hie kun niet zo gauw weg weden, dus waor was e dan? Vast bij oes achter `t hoes! Het benauwde zwiet brak mij oet, mar gelukkig kreeg ik even later contact met ien van de buren en die har hum zien weglopen verder de straot in. En dat hebt ze weten daor!! Ik dacht dat `t met een sisser oflopen was, mar tot mien stomme verbazing belde de plietsie de volgende dag dat oes kentiekenbewies op het plietsiebureau lag. 

Huh?? Har e wat drommel in oeze auto zeten! 
Vandaor dat ik hum al zo snel niet meer zag! Hie zat in oeze auto toen ik um `t hoekie van `t raam keek! Wij waren niet de ienige die de auto niet op slot har, want hie hef op meerdere pekken zien slag slaon. Gelukkig hef de plietsie hum nao een wilde achtervolging in de boeien slaon en in `t hok stopt! 

Een goeie leer veur een aander keer: auto altied op slot zetten!!

Oes Eig'n Kraantien

 

Plaats reactie

De redactie behoudt zich het recht voor, ingezonden reacties niet te publiceren, indien de redactie meent dat deze reactie onnodig kwetsend is, of beledigende inhoud bevat.

Informatie

Zweeloo-digitaal is een initiatief van en voor inwoners uit de regio Zweeloo en omstreken en voor iedereen die interesse heeft in de regio. Het is een niet-commerciële website. Als u aanvullingen, tips of journalistieke inbreng heeft ontvangen wij die graag. Wij kunnen onze website daar weer mee verbeteren.
Rechts hiervan kunt u het Contactformulier openen.

DB Sweel