Corona kwam langs! Daor waren wij dus mooi klaor met! Non ja, wij waren agil niet slim ziek, mar toch nèt ziek genog.
Hiet en kold tegelieks, kopzeert en gien klein beetie ok, hiel arg in de hals en ´t leek wal asow een wedstriedtie deden wel 't hardste kun hoesten en proesten. Veer dagen hew op de bank legen, mekaar lodderig ankeken en de ien klaagde en stende nog harder dan de aander. Overleverd an corona!
En dan moej naogaon, daw in meert altied al een toertie met de camper op stap gaot! Mar dat zat er ok niet in, want veur de corona har meert ok nog ies reurt met zien steert en kregen wij biester weer met snei en gladdigheid!
Dan mar met de Paosken der op oet!
Het was veul kolder dan veurig jaor um die tied, mar ik mus en zul op tjak, der was gien holden an. Een extra dekberre, warmwater kruken, gewone tuuteier en paoseigies van sukelao um te slikken ... en op pad! Ach ja, wel döt je wat, kold is 't bij hoes ok! Wij hebt een nachie in Harderwiek slaopen, daor hew een dikke puut Vlaamse friet eten ('t is mar waj belangriek vindt), en wij hebt een paar nachies slaopen op de kade in Tolkamer met oetzicht op de Rijn, ij kun ´t zo gek niet bedenken, mar daor vaart de godganse dag van alles en nog wat vlak veur je neus langs, grote schepen oet Nederland, mar ok oet vrömde landen met van alles der op, auto´s, grote trekkers en aal wat meer, körtum te veul um op te numen, ij kiekt je de ogen oet de kop!
Oog in oog met de wolf ... Genieten?? Liekt mij stark
En wij hebt ok nog een aantal dagen fietst over ´t Dwingelderveld, zó mooi! 'k Heb nog oetkeken naor de wolf, mar hie leut zuch niet zien. Ik was der wal op veurbereid, want ik har goeie veurlichting had van een boswachter, die zee dat aj onverwachts met hum oog in oog zulden kommen te staon, daj dan veural niks mussen doen, gewoon doodstil staon blieven en ... genieten!
Ja ja, dank je de koekoek!! Genieten?? Liekt mij stark! Ik bin wal gien mals gruun bladtie meer, mar toch! Ik bin as de dood dat e mij opvret!
Oes Eig'n Kraantien
