Wij bint op vekaansie, mar ik krieg alles gewoon met, 'k was niet van plan um mij der drok um te maken, mar ik zit mij op te vreten over van alles en nog wat want het liekt smangs wal of elkenien zien verstand verleuren hef.
De iene schrieuwt zus en de aander schrieuwt zo en iedereen denkt dat e het geliek an zien kaant hef. Een stellegie naffels, zul mien breur vrogger zegd hebben, toen e nog leefde. Het weer lat zuch niet van zien beste kaant zien, alle dagen regen en dus schrief ik vanoet de camper mien babbelegoegies, he`k mooi wat te doen!
Rutte mus vort en Rutte gung vort en laow eerlijk wezen, hie har der natuurlijk een pottie van maakt! Mar op zun positie doej 't nooit goed, iedereen wet 't beter. Ik ok!
Mar wel möt non oeze neie premier worden?
Dat Turkse vrouwgie van de VVD met die achternaam die deur de gemiddelde Nederlander niet oet te spreken is?
Of die Timmermans, die veul weg hef van vader Abraham? De fans van vader Abraham wilt dit agil niet heuren, zie beschouwt het as een belediging! Dat zeg genog!
En wat dunkt je van sweet Caroline, die vrouw van de boerenpartij?
Ziej 't al veur je, een minister presiden in 'n leren jackie en grune of blauwe nagellak? Kan toch niet? Dat ophemeln van die boerenpartij vin`k ok hielemaol niks! Ik denk dat er bij mij nog teveul old zeer zit, want vrogger har een beetie boer een arbeider niks in de reken. Een boerenknecht kwam niet bij de boer en boerin an taofel, hie mus zien plakkie stoet opeten op de deel.
En dan hew Pieter Omzigt nog, het volk lop met hum weg en hie wordt de hemel inprezen! Dat wordt veuls te veul druk op de ketel, dat trekt e niet! 
Körsdaags har ik visite van iene waor 'k ,'t miestal best met kan vinden, ok al denk wij niet overal geliek over. Wij kregen 't over de vacature minister prissiedent: ze vun dat 't wal veur mij was: even hen de kapper veur een net bossie haor, mantelpakkie an, cursussie dit en cursussie dat en klaor was Kees, een veraodeming veur Nederland. Zölf vuulde ze wal wat veur de portefeuille asielbeleid! Alle boetenlanders der oet en de pikzwarte Zwarte Piet weer um en chocoladezoenen gewoon weer negerzoenen laoten hieten!
Over Zwarte Piet en die negerzoenen maak ik mij agil niet zó drok, mar wat betreft dat eerste, bin ik 't lang niet met heur iens! En dat laot ik heur weten ok! Vrijheid van meningsuiting nuumt ze dat! Dat geldt veur heur, mar ok veur mij.
Een mèens die op de vlucht is veur oorlog en geweld, hef recht op hulp!
Punt oet!
Oes Eig'n Kraantien
