Ik realiseer mij opiens da'k as de gesmeerde bliksem een verhaaltie moet schrieven, aans krieg ik vast gien kersttol met de kerstdagen!
Niet da´k argens op solliciteer heur, mar de brutaolen hebt de halve wereld, zó is t wal!
Hol je vast, ik gao even klagen en stennen: der scheelt mij de lèeste tied van alles en nog wat, algehiele malaise! An 't iene bien een versleten knie, an de voet van 't aandere bien iets wat op hielspoor liekt, mar gien hielspoor is, mar wat wal slim lastig is en gao mar deur.
En dan zeg de podoloog: Zoolties in de schoenen, ij moet stoppen met zoveul lopen, rust moej hebben, des te gauwer giet 't weer over. Ja mien voet vindt dat inderdaod wal prettig, mar de rest van het lichaam wordt er doodongelukkig van en wil der op oet. Nim dat mar rustig van mij an, an lopen kuj verslaafd raken, net zo goed as an roken en an drank. Allerlei ontwenningsverschiensels steekt de kop op! Harregat, ik wor old! En ij hebt vast wal ies heurd dat elkenien geern old wil worden, mar old weden, dat is een aander verhaal!
Dus, dan maar een gulden middenweg kiezen, wal lopen, mar ien keer per dag en niet zo wied, dan möt die hielspoor die gien echte hielspoor is, mar een ontsteking van de peesplaat en aans nog een pezie in de voet mar wat langer anholden. En hoe'k der an kommen bin? Joost mag 't weten!
En non bin'k weer an 't schrieven en knap gelukkig weer wat op. Ik laot mij toch zekers niet kisten! Bij wal wies! Ik loop weer, ik zet gewoon het iene bien veur 't aandere en kiek an, het warkt! Ik liek wal een gedrochie, mar ik kom veuroet!
's Mangs dan lop der ok een hondtie met, die het Puck en Puck is een kruzing tussen een Teckel en een Jack Russell, dat nuumt ze een Jackteck, of een Teckjack en die Jackteck of die Teckjack, hoe aj 't ok mar numen wilt, is stapelgek op mij en ik op hum! Ik vin hum zó grappig, hie speult met zuchzölf! Hie vlög alle kaanten op, behalve de goeie, mar hie möt nog twie jaor worden, dus het is aal jonkheid!
En non komt 't: ik val ok al helderweg een toertie op vrouwen, echt waor, ik bin denk ik opiens oet de kast kommen, verliefd tot over mien oren op Betje, Katootje en Sientje! Drie schone Spaanse dames, die bij oes in de straot woont en waor 'k geregeld met hen 't bos gao en die'k dan lekker verwen.
Mar let op: Pikanter wordt 't vandaag niet, het betreft hier honden en hondekoekies!
Oes Eig'n Kraantien
