Gelukkig neijaor! Hej de jaorskoeken al klaor? Een zeupie derbij is goed veur mij!
Non ja, een beetie an de late kaant. Mar beter laat as nooit toch? Ik zal je vertellen hoe dit zo komp: ik vin dit zu'n mooi riempseltie en dat he'k begun jannewari al opschreven, mar toen har ik der opiens gien aordigheid meer an. Ik har gien zin meer. Dus, ik mus eerst zin maken en dat was gien makkelijk recept.
Vandaag 7 febrewari he'k weer volop van dat spul dat ''zin'' het en dus wens ik bij dizze elkenien een gelukkig neijaor van wat er nog van over is, mar laot dat zeupie en die koekies mar zitten. Het giet er ja wal goed um! Aj 't riempseltie mar lezen hebt! Vandaag was ok de dag dat Pieter Omzigt zee dat e mu was en dat e niet meer met dee an de underhandelingen veur een nei kabinet. Plasterk en de aandern waren hiel hellig, want ja, dit schöt zo niet op. Der zal toch ooit een neie regering moeten kommen! Aans moe'k strakkies zölf an de bak en ik bin bang dat dan alles pas echt in de toezel lop! Ik heb niet ver genog deurleerd!
Dan bi'j toch een slapjanus?
Ach, ik praot natuurlijk as 'n kip zunder kop, ik heb ja gien verstand van poletiek, mar ik bekiek 't op een simpele menier: bi'j drok met mekaar in de weer um een moeilijk prebleem op te lössen en dan is der iene die opiens zeg: ik heb der gien zin meer an, bin mu, gao hen hoes, toedeledokie. Dan bi'j toch een slapjanus?
Gien visiteplatie veur oes land
Omzigt en Wilders ligt mekaar veur gien meter, da's een ding, da's zeker! Ik loop ok niet vort met Wilders, ik hoop niet dat e ooit minister prissiedent wordt, want ik vin hum gien visiteplatie veur oes land. Starker nog, ik zul mij der de ogen veur oet de kop schamen! Mar ja, het volk hef keuzen en dat liekt mij toch rechtsgeldig. Mar ... dat mu wezen van Omzigt, dat zal wal zu'n voort niet lopen, ik bin ok wal ies mu! Mar ofhaken? Tuurlijk niet, der möt wal eten op de taofel kommen! Lekker belangriek toch? En veur Omzigt geldt dat er een nei kabinet kommen möt, dus mu wezen, is gien excuus!
Haken en ogen
En dan die oorlog in de wereld! Toen de Russen Oekraïne binnen vulen, dacht ik met mien domme verstand dat de rest van de wereld die kabolter daor in Rusland wal een koppie kleiner zul maken. Nee dus! Der zit veul meer haken en ogen an as dat ik dacht.
Arme kleine kinderties
En de toestand in de Gazastrook wordt ok aal arger. Die arme kleine kinderties daor! In wat veur wereld leef wij toch!! Mien moe zee altied: het lig niet an de wereld, mar het lig an de mèensken die der in woont. Tja ... mien moe har ok niet deurleerd, mar wus precies hoe 't zat!
Op de tillevisie heur ij der al lang niet meer zoveul over as in 't begun. Het liekt wal ow der aan went. Het mus niet kunnen!
Oes Eig'n Kraantien
