Babbelegoegies is veurig jaor oetkeuzen as ’t mooiste Drèentse woord. Veur ’t geval daj niet weet wat of ’t betiekent, za’k je dat eempies oet de doeken doen.
Babbelegoegies betiekent er malligheid of fratsen, mar ok wal gewoon praoties.
En toen dacht ik van yes !!!
Dat kan ik ok wal, praoties verkopen. As de beste !! Ik heb ja ’n goeie leermister had ! Juust.....mien hond ! Binkie ! Weej nog wal ?
Die is accuut stopt met praoten en döt niks aans meer as bleken. Der is gien touw an vast te knuppen. En hie wul ok agil niet meer umliek. Toen e nog klein was, was der niks met te doen, echt niet. IJ kunt ’t vergelieken met dat liedtie :
”Toen onze Mop (Bink ) een Mopje ( Binkje ) was ! Allennig, hie bet nog net niet.
Mar hie fluustert mij gien grote verhalen meer in en dus begun ik mar veur mijzölf.
Veul maakt ’t niet oet heur, want of ’t non oet de bek van Bink komp of oet mienende, ’t is ien pot nat ! Zie zegt ja aaltied dat de baos ( in ) en zien hond in de loop van tied aal meer op mekaar gaot lieken, non bij oes is ’t niet aans.
En dus kom ik je non algedurig met van alles en nog wat lastig vallen, want ja, die Drèentse taol hè, da’s ja mien hobby worden en ik bin niet meer te stuiten. Ik wul preberen um wat typische Drèentse dinger an te halen, mar verder kan ’t over van alles en nog wat gaon. Ik gao tiedens ’t lopen met de hond mien ogen en mien oren goed de kost geven en a’k dan wat bezunders in de smiester krieg, dan klim ik in de pen.
En dat gao’k ok doen as der wat is, waor’k mij slim drok um maak.
Beveurbeeld a’k argens hiel bliede um bin en ok a’k argens haost um reren moe. Mar ok a’k argens slim hellig um bin, zó hellig da’k haost oet mien vel spring. Mar ’t valt in de regel wal met heur......
Ik bin net zu’n blikken pannegie, zo hiet, zo kold !!!!! Kiekes !!!!!!
