Wij hebt net een paar mooie dagen achter de rugge. ’t Vuulde al echt veurjaorsachtig an.
Mar vandaag is ’t compleet snertweer. ’t Regent an ien stuk deur. En ij kunt klagen en stennen waj wult, mar ij doet ’t er niks an.
Mien moe zee eerder aaltied : ”Da’s mar goed ok, want aans dan kriej nog veul meer oorlog en geweld in de wereld”.
En da’s natuurlijk ok zo, want ’n mèensk is betoeren een raar ding.
De iene wul dit en de aander wul dat. IJ kriegt mar zo niet iederien met de neus dezölfde kaant op.
Hej mij wal zien de lèeste tied ? Hej dan ok wal zien, hoe gek as ik luup ?
Juust, ik luup naost de schoenen en ik har ’n krop as brötse hen.
En da’s nog niet alles, want körsdaags ruup de slager in oeze supermarkt tegen mij, da’k aal niet zo met de neus umhoog mus lopen.
Oh oh....hoogmoed komp veur de val !!!
Inmiddels stao’k weer met beide bienen op de grond.
Mar mien missie is volbracht ! ’k Heb de honderddoezend niet wunnen, mar wal ’t Drèentse dictee van 2009 in ’t Sliener dialect. En dat paste natuurlijk wal in mien straotie, eerlijk is eerlijk. Mar ’k was der niet minder bliede um.
Zo is de iene hier goed in en ’d aander daor in. Ik kan toevallig een beetie goed Drèents schrieven, da’s ’t hiele eiereten en ’t möt je natuurlijk ok ’n beetie liggen. Non moej niet denken, dat ik alles weet heur, want ik bin gien profeet ! En ik kan ok ’n hiele koppel dinger niet. Ik bin smangs slim ofguunstig op vrouwlu, die hiel handig bint met de neimesiene.
Daorveur moej dus niet bij mij weden, want neien en breien, da’s niks veur mij. Daor komp niks van terecht. Dan kriej malle tonten um ’t lief !
En in reken bin’k ok ’n stumper.
Ik weet nog net dat ien plus ien twie is, mar daor hej ’t ok haost met had.
Gelukkig bint er rekenmesienegies ! Een hiele oetkomst.
En bij ’t schrieven op de computer hej vanzölf grammaticacontrole.
Mar aj in ’t Drèeents wilt schrieven, dan hej ’n prebleem. Dan komt haost under alle woordties rooie streepies te staon, as tieken dat alles fout is. Mar dan moej mar net doen asof je neus blödt !
Dan moej mien Geert hebben !
Die vertelt je zó oet de kop hoeveul as beveurbeeld zeshonderdzesennegentig + achthonderdzeuvendartig is. Nou ??!!
Mar met de d en de dt’gies wet e zuk gien raod.
En van auto’s wet e ok alles. Woorden as andriefashoesrubber en getande riem en weet ik veul wat, vliegt mij dagelieks um de oren. En al slaoj mij dood, ik zul bij God niet weten, wat of ze betiekent.
Mar gien nood : Geert kan wal reken en ik kan wal schrieven, dus .......
Wij vult mekaar mooi an ! Tot ’n aander maol !!!
