.

.

 

.

Babbelegoegies nr. 8

In mei legt alle vogelties een ei ! Het spul hef ’t er mar drok met, ’t nust möt klaor. De zwalvies hebt bij oes hoes ok weer een daalders plekkie oet zöcht.

Aj niet oppast, dan schiet ze je pardoes op de kop aj  bij oes de veurste deur ingaot. Mar ik laot ’t rustig geworden, ik kan ’t niet over mien hart verkriegen um ze vort te jagen.

Ach ja, de natuur giet gewoon zien gang, allennig dat weer wul niks. Een toertie leden hew nog een paar mooie dagen had. Elkenien har toen geliek ’t veurjaor in de kop ! Jan en alleman stun op de kop in de tuun.

Ien van mien buurmannen kun ’t  niet laoten um mij der op te wiezen, hoe drok as e ’t wal niet har en dat ik toch mar een verwend wiefie was, dat allennig mar een beetie kuierde met dat hondtie.

Tja... ij hebt non ienmaol warkpeerde en luxe peerde !!

Non moej niet denken, da’k aans niks doe, want ik bin best wal reur met van alles en nog wat. Ik heb beveurbeeld al een aantal aovends mal zitten zwieten um een stukkie te schrieven veur de culturele aovend veur de toonstelling in Daolen. Waor moej ’t ok aal weer over hebben hè ?

Ik ken trouwens nog wal een mooi gezegde, want mien moe komp oorspronkelijk oet Daolen en die zee dat vrogger altied al:

In Daolen is niks te haolen

niks as klompen en klossen              

magere ossen

grote buulen zunder geld

zo is ’t in Daolen gesteld.

Ik las körstdaags dat verhaaltie van Theo Voortman in oes eigen kraantie.

Ik wus agil niet, dat e zó mal te pas kommen was.

Ik las, dat e een schietgebedtie daon hef um te overleven.Tjonge jonge, hie mag nog van Goddank spreken, dat e ’t nog naovertellen kan in wat veur taol dan ok.

En dat Drèents van hum, dat was superformidabel !

Veural dat woordtie helekoppiedinges ! Prachtig, die hol wij derin.

Bij oes in de straot woonde vrogger een vrouwgie, dat har der ok zu’n mooi woord veur : hietekopthee. Theo kan in elk geval zó metdoen an ’t Drèentse dictee, de poedelpries zit er wal in. Mar alle gekheid op een stokkie, ik hoop, dat e inmiddels weer de olde is. En zo niet, dan wens ik hum bij dizze hiel veul beterschap, ok namens mien Geert. En........een kwipsel van dat zwarte siepie !

 

Ach, een foutie meer of minder ............

Plaats reactie

De redactie behoudt zich het recht voor, ingezonden reacties niet te publiceren, indien de redactie meent dat deze reactie onnodig kwetsend is, of beledigende inhoud bevat.

Informatie

Zweeloo-digitaal is een initiatief van en voor inwoners uit de regio Zweeloo en omstreken en voor iedereen die interesse heeft in de regio. Het is een niet-commerciële website. Als u aanvullingen, tips of journalistieke inbreng heeft ontvangen wij die graag. Wij kunnen onze website daar weer mee verbeteren.
Rechts hiervan kunt u het Contactformulier openen.

DB Sweel