Si tu as plus de 50 ans et que tu ne ressens rien en te levant, alors tu es mort!
Ja, da's gien Drèents, da's een Frans spreekwoord en dat betiekent: aj boven de vieftig bint en aj niks vuult aj 's mörgens opstaot, dan bi'j dood!
En daj as 'n old mannegie of vrouwgie hen de keuken strompelt en je overal an vast moet holden um de pillegies en poeierties die neudig bint um de dag deur te kommen vort te spulen met een kop koffie of met wat dan ok, da's juust goed, dan b'j gelukkig nog niet dood. Aj ienmaol op gang bint, dan lop 't weer as een tierelier en dan vuul ij je springlimtig!
Ach, ik wil der nog niet best an, mar ik weet 't wal, ik bin old en hier en daor wat versleten en heb last van phpd (pijntje hier, pijntje daar). Mar der an toegeven? Ho mar!
Ik heurde lèest van iene die net zo old is as ik en die ok ok wat scheelt, dat ze an een dokter vraogd har, of ze der wal old met worden kun! Antwoord van de dokter: mar mevrouwtje toch, u bent al oud! Oeps ... dan worj toch mar even mal met de neus op de feiten drukt! Ik har hum de middelvinger opsteuken!
Dokter hef ies tegen mij zegt dat de zumtigers van non de vieftigers van toen bint. Zit wat in! Mar vieftig plus of zumtig plus, dat maakt toch wal weer verschil, ik bin van die lèeste cathegorie en echt waor, ik loop wal veul te klagen en te stennen! Mar ... ik wil gien hiel vervelend old narrig wiefie worden! Dus ... kop der veur en deur gaon!!
En dat Franse gezegde holdt mij op de bien ... het is hiel gewoon daj allerhande kwaolties kriegt aj older wordt! Eigenlijk moej gewoon bliede weden dat alles wat kraakt en zo en daj wat tied neudig hebt um op gang te kommen. Gef allemaol niks, ij leeft!
En zo lang der leven is, is der hoop toch?
Hoop daj nog genieten mugt van alles waj wal kunt en dat is veur elkenien weer aans. Mar genieten van de prachtige natuur, van alles wat er gruit en bluit is gratis. En die natuur is de ofgelopen maonden zu'n beetie ontploft, de brem, het fluitekruid, hiel veul lupinen, botterbloemen, seringen en gao mar deur! Stap in de auto of gao lopen aj nog een beetie goed ter bien bint of stap op fietse, achter de rollator kan ok, of op de scootmobiel of um mien part op de autoped.
Achter de geraniums zitten, kan altied nog!
Oes Eig'n Kraantien
