Hiel vaak as ik oet 't raam keek richting de bushalte en ik zag de peerdties door zó vredig op dat stukkie gruun grazen en speulen, dan weur ik zó bliede!
Mar zie bint vort ... en 't stukkie gruun lig der troosteloos bij. Toen 't nog gemientegrond was, weur 't altied mooi optied meid, mar dat is al weer helderweg een toertie leden. Dat was veur dat 't busstation der kwam. Die grond waoras dat busstation non op stiet, har de gemiente toen neudig en diegene waoras die grond van was hef toen in ruil daorveur dat stukkie kregen wat bij oes veur 't hoes lig an de Kloosterdwarsweg. Inmiddels is 't al weer in handen van een aander en daor is niks mis met, der wordt niet meer meid deur de gemiente, mar dat gaf ok niks, zolang de neie eigenaar der peerdties in leut lopen, huulden die het gres mooi kört! Dus een idyllisch plaatie!
Mar non bint de peerdties weg en ik bin bang dat ze ok niet weerkomt, want alle draod en voor-en waterbakken bint ok vort haald. Zó zunde, want het is bepaald gien visiteplaatie aj vanof Emmen over de grote straot Zweeloo Kunstenaarsdörp binnenkomt. Want bij een kunstenaarsdörp stel ij je toch wat aans veur! En klagen bij de gemiente helpt niet, want het is heur pakkiean niet meer! Dus ... klaag ik der hier over! En non'k toch ienmaol bezig bin met klagen ... kan'k net zo goed nog even deurgaon ... de milieustraot bij oes op 't darp!
Neie milieustraot argens in de buurt van Wachtum
De gemiente Coevern vindt dat er een neie milieustraot kommen möt, argens in de buurt van Wachtum, want zo zegt ze, de olde hier bij oes in Zweel en die in Coevern, voldöt niet meer an de eisen van dizze tied en möt dicht. Op de neie plek komt dan ok een weegbrug, dat hebt ze ofkeken in Emmen en in Hoogeveen. Ik heb der gien verstand van, dus zie kunt mij van alles wies maken, mar ik bin bang dat 't veurnamelijk um een weegbrug giet. Misschien komp er dan meer geld binnen? Of misschien ok wal niet, ij moet de mèensken niet al te veul an de portemonnee kommen.
Mar ien ding wee'k wal, hier in Zweel bij de stört is 't altied smoordrok! Smangs staot de mèensken ik weet niet hoe lang wal in de file! Da's een goed tieken, dat holdt in dat mèenken de rötzooi naor de plek brengt waor 't heurt en dat ze 't niet dumpt in de natuur. Zie bint dus van goeie wil, mar ... wal binnen bepaalde grèenzen! En daor zit hum de kneep! De grèenzen moet verlegd worden en nog gien klein beetie ok!
De Zweeler moet verder rieden, kost tied en geld, niet best veur de portemenee en ... ok niet veur 't milieu! En wat te denken van de mèensken op Schonnerd! 700 Handtiekeningen hebt ze daor al verzameld veur het behold van milieustraot Zweel, want inplaots van 7 kilometer moet ze dolkies 27 rieden um ofval weg te brengen. Dat vrag um illegale störtingen!
Niet elke veraandering is een verbetering!
Oes Eig'n Kraantien
