Klabams! De fiets glee mij zo under 't gat vandaon! Ik vuul met 'n smak op de grond en aj een daggie older bint, dan bi'j mar zó niet weer in 't einde.
Wij waren op verjaordag west bij iene an de Aelderstraot en het was een uur of vief toen wij weer op hoes an wolden, veul honger haw natuurlijk niet, want wij hadden net een dik stuk gebak achter de koezen. Mar goed, de visboer stun der en mien kameraodtie, waor 'k al haost zestig jaor dikke verkering met heb, zul vis met nimmen en ik zul alvast hen hoes gaon, de kachel opstoken en de lampen an doen.
Mar ja, toen kwam 't! Ik wus wal dat ze tussen Daan en het Wapen van Aelden met warkzaamheden bezig waren, mar ze hadden der rieplaten hen legd veur de fietsers. Dus ... gien prebleem zuj zeggen toch? Mar ... wat ik niet wus, is dat er een gevaorlijke richel op zat, diej overdag wal ziet, mar in 't donker dus niet. En aj met je baand tegen die richel ankomt, gaoj gegarandeerd van de bienen. Dus, daor kwam ik met te pas! Ik heb non ienmaol gien katteogen! Het is gelukkig goed oflopen, ik had niks, alles dee 't nog! Mar mien kameraodtie hef der achteran beld, um verdere ongelukken te veurkommen, maar ja, ij kunt bellen waj wult, aj tegen dovemans oren praot, dan hef dat gien enkel effect. Der möt zeker eerst wat args gebeuren, dan kan 't weden, maar ... as het kalf verdronken is, dempt men de put!
En juust dat hebt ze met die bomensnuierij in Aalden wullen veurkommen! De wildste verhalen deden de rondte: zie waren kommen met groot geschut, der weur zaagd en der weur kapt en gao mar deur. Complete kaalslag! En ... ij keken non zó bij aandern in de roeten!
Tuurlijk, aj een mooi dichtbegruid padtie acht 't hoes hebt, waor veul vogelties en iegelkoorties en zo hoest en waor aj 's aovends mooi je hondtie even kunt laoten pissen en poepen (wal oprumen) veur 't hen berre gaon, dan wuj dat graag zo holden! En as der dan op een dag een brief van de gemiente op de mat lig, dat ze de boel drastisch an pakken gaot, dan schrik ij wal even!
Het was een voldongen feit! Gien inspraak meugelijk! En eh...landjepik was ok ten strengste verbeuden!! Wel dat daon hef, kan zo maar op de bon slingerd worden, of arger nog, misschien komp e wal in 't hok! In ieder geval wordt er overweugen um passende maotregels te treffen! Ik dacht, daor wul ik ies even het juuste van weten, dus veurige week ikke der lopend op oet! Het was bérekold, mar ik har mij warm antrökken. En ... ik har geluk, in de buurt van de Bosakker waren ze net de boel an 't oprumen en daor tröf ik iene die der verstand van har. Een heuse bomendokter! Ik gaf mij oet as verslaggever van OEK en hie stun mij met alle plezier te woord.
Bomen die kapt bint, dat waren bomen die niet veilig meer waren. Of ik wal ies heurd har van een klapoksel. Nee dus, nooit van heurd! Dat hef e mij dus evenpies haorfijn oetlegd. Het komp veur bij een boom waorvan de stam zich splitst hef en as der in die splitsing bijveurbeeld vaak water blef staon, dan kan dat gaon rötten en dan kan der zó mar een stuk ofbreken en aj daor dan nèt loopt, dan kuj hum zó mar op de kop kriegen. En ok bint er bomen kapt waoras de hedra tot in de top gruid was. Dan hef de hedra de boom verstikt en kan e umvallen. Levensgevaorlijk!
Tja, het möt eerst altied mal worden veurdat 't weer mooi wordt, mar gelukkig bint er nog zat bomen over en dolkies as alle bossies weer wat angruid bint, dan ruist het weer as vanouds in het struikgewas! En ... het kalf is niet verdrunken!
Oes Eig'n Kraantien
