Ik schrief al jaoren een verhaaltie in OEK en der hef nog nooit iene argens anstoot an nummen.
Mar körtsdaag was ‘t zó mar raak! Der was iene slim hellig op mij. Ik heb een hekel an zwarte gezichten en daorum heb ik besleuten um in ‘t vervolg beter nao te denken eer da 'k ‘t opschrief, want as 't ienmaol op pepier stiet, dan stiet ‘t gedrukt! En ij moet mekaar niet bij de kop kriegen, da's niks weerd, daor komp allent mar narigheid van! Vaak vliegt dan de verwieten over en weer en dan gaoj eer daj der op verdacht bint dingen zeggen, waoraj later van denkt: ha'k mij mar stil holden.
Ja, die tong is en blef een gevaarlijk stukkie vleis en zörgt vaak veur ruzie. Zunde, want der is al zoveul strijd op de wereld, De mèensk maakt er een pottie van. Iederien vecht mekaar de tent oet! IJ huuft de kraant mar open te slaon: overal oorlog, dood en verdarf!
En ok veur oes Nederlanders is de dreiging van oorlog in lange tied niet zo groot west, stun in de kraant. Wij moet veurbereidingen treffen: eten inslaon dat niet an bedarf underhevig is, een radio op batterijen en pillen um water te zuvern enz enz. Oh ja, aj nog wat geld op de bank hebt, geliek ophalen en goed opbargen, bijveurbeeld in een olde sok of zo under ‘t berre, zodaj een toertie veuroet kunt. Dit lèeste stun niet in de kraant heur, ik mus even an vrogger denken.
Mar toen kwam 't en dat stun dus wal in de kraant: een kruusboog um een knienegie of een haasie te schieten zodaj je stukkie vleis niet huuft te ontberen! Toen dacht ik: wor wij non zó veur de gek holden?? Of wat is dit? Ik zie mij al gaon, op jacht met pijl en boog! Dan mugt ze die knienen en die hazen eerst wal zolt op de staart leggen!!
Het jaor wat achter oes lig, hef veul ellende met zuch metbracht. Ziekte en overlieden, het kwam wal hiél dichtbij en het is oes niet in de kolde kleren gaon zitten. Het besef dat ‘t nooit meer wordt zoals ‘t was, döt zeer.
Tot slot nog even dit: as ik iene per ongeluk veur schut zet heb of op wat veur menier dan ok kwetst heb, dan wil ik best met 't water veur de dokter um excuses an te bieden. Mar … ik gao niet op de knienen!
Ik wens elkenien een gelukkig en veural gezond neijaor!
Oes Eig'n Kraantien