.

.

 

.

‘Een ongeluk zit smangs in ´n klein hoekie!

Der giet gien aovend veurbij of mien stoere hond en ik loopt veur ’t hen berre gaon het gebroekelijk rondtie: Kloosterdwarsweg - Marktstraot - Klooster ...

(even veur oes olde hoes langs, ’k heb der mar liefst 25 jaor woont ) en dan weer hen de Kloosterdwarsweg. 

’s Aovends in ’t donker passen, daj niet deur de ien of aandere snelheidsmaniak van de sokken reden weurden en ik bin slim beneid hoe dat de kommende tied mussen ij altied hiel goed op zal gaon, as ’t weer vrog duuster wordt.

Der weur veuls te hard reden! Dartig was de limiet, mar der trök zuch gieniene wat van an. En dus weur der een actie op touw zet! Dat was mar goed ok, want der waren al welkenden, die zuch der zo kwaod um muken, dat ze al met opzet auto’s op de riebaan zetten, um op die menier 30 kilometer of te dwingen. Tja.... mar um een gevaorlijke situatie te creëren ten behoeve van de veiligheid, da’s toch niet de juuste weg, liekt mij.

Gelukkig kwam der al rap een aandere oplössing! Dörpsbelangen Zweel, gung de barricaden op veur de veiligheid van de inwoners en veurnamelijk veur de kinder in het Klooster. En dat was hard neudig! Op een goeie zaoterdag in ’t veurjaor gung de actie, die understeund weur deur Veilig Verkeer Nederland van start.

Het bint gewoon van die dinger waoraj op zien kunt, hoe hard oj riedt. Der weurden 30 km campagneborden ophangen en under het toeziend oog van de oldelu gungen de kinder oet ’t Klooster drok in de weer met 30 km stickers veur op de containers. Der waren twie wetholders van de gemiente Coevern bij anwezig en der weur an beide kaanten van de weg een SID plaotst. SID stiet veur ’Snelheidsinformatiedisplays’. Da’s een hiele mond vol!

En waarachtig, het huulp!! Veural op dunderdag, as de containers an de weg stunden. Wij bint non een mooi toertie wieder. Ies kieken hoe ’t non met de scheuriezers steld is. De veurzitter van Dörpsbelangen hef wat mèensken oet ’t Klooster der naor vraogd en het volgende kwam oet de bus:

Der bint drie categories:

a) IJ hebt de mèensken, die van goede wil bint en die zuch dus keurig an de 30 km holdt.

b) Maar.... der bint ok welkenden, die denkt : ’Actie van de baan, dus...gaan met die banaan!! Dat bint de asootjes, zuw mar zeggen.

c) En........veur sommige mèensken zulden de containers der zeuven dagen in de week moeten staon. Die kunt bliekbaar niet zo goed wat ontholden of zie bint hardleers!

Hoe non wieder?

Veur groep b en c moet er misschien wal harde acties kommen, zodat de plietsie ze op de bon slingern kan. Wel wet, helpt dat, de mieste mèensken hebt er een barre hekel an aj ze an de portemonnee komt.

Mar ’t zul niet neudig weden as elkenien de regels in acht nimp en de gedachten goed bij de weg holdt, ( dus, ok weer niet te veul op die kilometerteller kieken ) want:

  • Een ongeluk zit smangs in ´n klein hoekie!
Plaats reactie

De redactie behoudt zich het recht voor, ingezonden reacties niet te publiceren, indien de redactie meent dat deze reactie onnodig kwetsend is, of beledigende inhoud bevat.

Informatie

Zweeloo-digitaal is een initiatief van en voor inwoners uit de regio Zweeloo en omstreken en voor iedereen die interesse heeft in de regio. Het is een niet-commerciële website. Als u aanvullingen, tips of journalistieke inbreng heeft ontvangen wij die graag. Wij kunnen onze website daar weer mee verbeteren.
Rechts hiervan kunt u het Contactformulier openen.

DB Sweel