Wij moet op de barricaden veur oes zwembad, zie wult ’t vortbezunigen. ’t Is toch niet te geleuven, wij holdt hier in Zweel niks meer over.
Eerst weur der bekend maakt, dat er gien subsidie meer komp veur De Spil en non zal dat waoras Zweel altied zo trots op west is ok nog naor de filistijnen hölpen worden.
Toen wij een aantal jaoren leden bij Coevern voegd weurden, waren wij daor al niet slim wies met. Oes nog vrij neie gemientehoes gung dicht en wij mussen mar hen Coevern reizen um bepaalde zaakies te regeln. Non ja, zo vaak hej non ok weer gien nei riebewies of wat dan ok mar neudig, dus dat vuul nog wal met.
Mar waoras veul mèensken toen al bang veur waren, kriew non op een prissenteerbladtien veurschötteld.
Het möt mar ies oflopen weden !
Een toertien leden hef dörpsbelangen Zweel veul wark maakt van een belevingsunderzuuk en daor kwam oet vort, dat het zwembad een hiele hoge prioriteit har. B&W is daor van op de hoogte bracht en dörpsbelangen har dit dus ok agil niet verwacht.
Wat hef al dat wark wat dörpsbelangen daon hef dan nog veur zin? Zie hadden net zo goed stil op de stoel kunnen blieven zitten !
Het bosbad in Noord-Slien mag blieven, dat is oetroepen tot ’t mooiste zwembad van Drenthe. Mar vrogger kwammen de kinder oet Noord-Slien massaal naor Zweel um te zwemmen want Noord-Slien har niks. Ja, de Kibbelkoele, mar dat was meer um te pootiebaden.
Wij hebt altied een prachtig zwembad had in Zweel, daor huuf agil niet over stemd worden. Oes zwembad hef zien sporen al hoog en bried verdiend !!
Een mooiere locatie veur een zwembad as bij oes vin ij nargens.
Mooi midden in ’t dörp !
Kinderties die zölf al vertrouwd bint in ’t verkeer kunt er zo nao schoeltied op fietse hen. IJ huuft er agil niet veur te reizen. Over bezunigingen gespreuken ! Het bosbad in Noord-Slien lig wied boeten de bebouwde kom, daor kun wij Zweeler niet zo ien twie drie evenpies hen.
Wel herinnert zuch niet meer Jan Westland, de badmister die hier jaoren zwemles geven hef ! Eerst mussen ij op ’t dreuge leren zwemmen, ja Jan regeerde met strenge haand, mar ’t hef wal zien vruchten ofwörpen. Wat hebt er een koppel kinder een zwemdiploma haald bij oes in Zweel.
Jan is al weer evenpies oet de tied, mar as e dit kun heuren, dan zul e zuch umdreien in ’t graf.
En da’s ondenkbaar, net zo ondenkbaar as ’t verdwienen van oes zwembad !!!
