.

.

 

.

De aoventuren van Binkie (deel 7)

 ’t Is goed oflopen heur !

Zie hebt mij niet beroofd van mien mannelijkheid.
’t Mus der ja ok nog net bijkommen. Of niet dan ?
Ik heb besleuten um mij de kop niet meer zo gauw gek te laoten maken en
’t vrouwgien zal mij in ’t vervolg beter in de gaten holden.
’t Komp heur goed van pas, want zo kan ze ’t geld van de dierenarts in de buus holden. Een mooi seksleven zit er veur mij dus niet in.
Der wordt wal iens zegd, dat die lu van oes koninklijk hoes in zu’n strak keurslief zit, mar ik denk, dat ’t nog wal ’n beetien metvalt.


Wij gaot ok wal ies op vekaansie hen Frankriek, mar denk mar niet heur, dat mien vouwgien ’n oogien dichtknep, as ik naor die gloepends mooie Françaises zit te lonken.
Die Bernhard hef ’t toch mar mooi evenpies flikt !

Non ja, verschil möt er weden natuurlijk.
’t Zal wal een ”koninklijk standje” west weden en daor bin ik vanzölf niet toe in staot. Bij mij giet ’t gewoon op ”zien hondties”.
Alhoewal, as ’t puntien bij ’t paoltien komp, is ’t allendonder geliek, ”poppies” wordt niet bracht deur de ooievaar en ”puppies” ok niet.
Daor komp wal wat aans bij kieken. Ja toch zekers ?
Och, op die seks nao he’k agil niks te klagen.
Vreten en drinken op zien tied en veer keer per dag der op oet met ’t vouwgien.

Wat wul ’n hond nog meer.
Elke aovend nao ’t eten en as de ofwas an de kaant is, dan gao wij ok altieding nog ’n blokkien um.
En smangs, dan kom wij welkenden tegen die bij oes in de straot woont.
Dat mannegien maakt zuk der nogal drok um, dat ’t vrouwgien en ik zu’n koppel an ’t pad bint.
Ik wol, dat e zuk koest huul, want ik heb ’t dik veur mekaar.
Volgens mij kan e ’t gewoon niet velen,want zien vrouwgien lat hum der mar ien keer op ’n dag oet en dan holdt ze hum ok nog stief bij de arm vast. Hie mag nog gieniens löslopen !
Of...zul e soms ok last hebben van dat typische mannegiesgedrag ????

 

 

Ik en mien sikketaresse wenst Jan en alleman en al mien soortgenoten een hiel mooi kerstfeest en ’n bar gelukkig neijaor !
Een hiel speciale kerstgroet an Joris van de domnee, umdat ik hum altied de pokkel volschel as wij hum tegenkomt.
Niet te veul bunkern en veural gien gaanzelever eten, want aj ziet hoe die arme stumperds vet mest wordt, daor wor’j mal van.
Kiek mar iens op de tillevisie, daor laot ze ’t smangs zien.
IJ kunt ’t er ja hiel best zunder.                                    Woef !!!!

Plaats reactie

De redactie behoudt zich het recht voor, ingezonden reacties niet te publiceren, indien de redactie meent dat deze reactie onnodig kwetsend is, of beledigende inhoud bevat.

Informatie

Zweeloo-digitaal is een initiatief van en voor inwoners uit de regio Zweeloo en omstreken en voor iedereen die interesse heeft in de regio. Het is een niet-commerciële website. Als u aanvullingen, tips of journalistieke inbreng heeft ontvangen wij die graag. Wij kunnen onze website daar weer mee verbeteren.
Rechts hiervan kunt u het Contactformulier openen.

DB Sweel