Een toertie leden har ik een pasfoto neudig, want ik mus mien riebewies verlengen. Op een bepaalde leeftied moej keurd worden, dat holdt in ...
... daj een daggie older wordt en dat ze weten wilt oj nog wal vertrouwd bint op de weg.
Mar ja, winkel Hollander is vort en dat is knap lastig, want ja, een hoestdrankie, een zalvie, pillegies tegen kopzeer en tegen liefzeer, snoepies veur aj 't in de hals hebt , wij waren der zó an wend.
En.. ij kunden der ok terecht veur pasfoto's en non dus niet meer. En aj veur alle wissewassies argens aan hen moet, daor worj niet vrolijk van, mar der was iene die wus mij te vertellen daj hen TIP kunden, daor deden ze dat non.
Mus der geliek an geleuven
Ikke der hen, wol allennig mar even kieken of ´t klopte, mar weur met open arms ontvangen, kwam der niet meer vort, mus der geliek an geleuven. Met drie man (vrouwen) stark nammen ze mij te grazen, bliede dat ze een slachtoffer hadden waor ze heur op oet kunden leven. Want....het was nei en ze mussen het nog leren en alle begun is moeilijk. Ik vuul dus met de neus in de botter! Ik weur proefknien!
…heb ok agil gien geld bij mij
Ik stribbelde eerst nog wat tegen, zo van: nee non niet, ik zie der niet oet, kom net met Bram (hond) oet 't bos en die zit nog in de auto en ik heb ok agil gien geld bij mij, ik kom vanmiddag wal evenpies weer. Der kwam niks van in, zie kunden 't non wachten en zie waren der mar tot een uur of twie en betalen kun later wal, dat kwam wal goed.
Mar....''Ik wil geern een beetie schier op de foto veur de kommende vief jaor, ik wil de rimpels een beetie verdoezeln en mien lieksteegie op de neus ok en ik heb 't haor ok ja zo mal op de kop staon...".
Zeer teleurstellende conclusie
Mar, der weur rap een spiegel teveurschien toverd.. Ik haalde mien handen wat deur mien bossie haor, har gelukkig nog een lippestiftie in de buus, keek in de spiegel en kwam tot een zeer teleurstellende conclusie: weinig eer meer an te behalen!
Alle rimpels glad streken
Die wichter vunden dat 't best kun, dus vort dan mar. Zo krek komt 't ja ok weer niet. Ik mus op een krukkie zitten en recht veur mij oet kieken. Een beetie naor veuren en een stukkie opzied en dan nog weer een beetie naor achtern, een flits en nog een flits en waarachtig, een prachtige foto! Ik stun der veul mooier op dan da'k bin, hiel natuurlijk en het leek wal of alle rimpels glad streken waren. En mien lieksteegie was as snei veur de zun verdwenen!
Knienekeutels en schaopekeutels
Laot ze mar lopen die wichter van TIP, zie maakt niet allennig mooie pasfoto's, mar zie verkoopt daor ok allerlei Drentse producten, zoas knienekeutels en schaopekeutels, ij kunt 't zo gek niet opnumen. IJ kunt er gerust hen gaon en, zie bint hartstikke aordig en klantvriendelijk
Hiel bliede met mien mooie foto gung ik hen de auto...en gelukkig...Bram zat er nog...met een raampie lös. (dat wal).
Oes Eig'n Kraantien d.d. 21 december 2021
