Artikel
De aoventuren van Binkie ( deel 14 )

 

 

Ik en mien sikketaresse hebt ’t alderbarstens drok !

Wij dreit overuren, want wij moet in ’t veuren warken, umdat wij virtien dagen op vekaansie gaot en wij vindt, dat de mèensken die in hoes blieft daor niet under lieden mugt. Zolang zunder dat eigenwieze boeksprekertien, dat kan toch niet. Of wal dan ?

Vanmörgen bin’k al evenpies hen de kapper west. Twie uur he’k der zeten.

Gien permanentien en ok gies wassen en watergolven.

Nee, ik mus plukt worden.

Non, ij kunt wal begriepen wat er van mij overbleven is.

Juust, een kale kip !

En...zie hebt ’t vrouwgien ok weer mal bij de portemonnee zeten.

’t Arme baosien möt er weer krom veur liggen.

Kiek, alles is zo schreiend duur worden de lèeste tied en dat komp allendonder deur die euro, dat sprek vanzölf. Wij loopt smangs wal iens met de bus veur ien of aander goed doel en as de mèensken der vrogger een gulden indeden, dan is dat non miestentied een euro. Mar, aj ’t um rekent, dan is dat wal twie gulden en twintig cent. He’k geliek of niet ?

Non ja, dat is ’t slimste agil nog niet, mar de bosschuppen bint ok zo duur worden en ij moet je natuurlijk wal an ’t eten holden.

’t Vrouwgien zeg altieding : ”Aj met bakker en schenker ofrekend hebt, maj bliede weden, dat elk an zien recht komp”.

En dan kuj wal zeggen, dat geld niet gelukkig maakt en dat ’t stinkt, mar daor trapt dit kleine donderstientien niet in. Aj ’t zat hebt, dan hej makkelk proten, mar denk er goed um : as armoe de deur inkomp, springt de liefde de roeten oet. Dizze spreuk he’k niet zölf bedacht heur. ’t Stun in ’n boekien, dat

’t vrouwgien ’n keer bij Hollander kocht hef. ’t Is wal hiel mooi hè ? Mar ij kunt ok gewoon zeggen : geld döt wondern, mar aj ’t niet hebt, is ’t dondern !

 

Non moej niet denken, dat mien vrouwgien altieding lop te stennen en te klagen heur. Dat mus der nog net bijkommen ! Nee heur, ze vuult zuk de keuning te riek. Logisch, want ze hef mij en heur man. Ja, ij leest het goed, de volgorde klopt, tenminste dat zeg ’t baosien altieding. Dus, over ’t algemien is ze best te gebroeken en ze is ok hiel veul op tjak, lekker met mij der op oet.

Zundags möt ’t baosien ok met, hie sputtert wal iens tegen, mar hie komp er niet under oet. Köszundags heb wij die neie wandelroute

”Aelden rondomme” lopen. Het was in ien woord : ”schitternd !”

Aj gien slimme bienen hebt, dan moej dat echt ok iens doen. Het is beslist de muite weerd ! En dan nog evenpies dit : Ik heb Daan veur groothals oetmaakt. Dat har niet weden moeten. Ik kan mij ’t haor wal oet de kop trekken, zu’n spiet he’k der van. Want, ik zal je iens wat vertellen : Ik heb ’n pottien roomijs van hum had. Hielemaol gratis en veur niks !

 

Woefff !!!!

 

Zoeken in de site

Binkie's aoventuren

Kunst & cultuurnieuws

Henk-Jan Tangenberg brengt ...

... oude piratenhit als kerstsingle. "De Zilveren Ster‘’ zo heet de nieuwe kerstsingle van Henk-Jan Tan...

dinsdag, 30 november 2021

Lees verder

Sinterklaasfeest

Wauw! Jongens en Meisjes wat is het een spetterend en geslaagd Sweeler Sinterklaasfeest geweest afgelopen zaterdag. Ik heb veel kinderen ontmoet en wat hebben we een plezier gehad. Ik wil de ...

dinsdag, 23 november 2021

Lees verder

Het Sweeler Sinterklaasfeest

Hallo Jongens en Meisjes! Eindelijk gaan we elkaar weer zien! Op zaterdag 20 november komen Sinterklaas en zijn Pieten een feestje vieren in Zweeloo. Natuurlijk vinden wij het leuk om jul...

dinsdag, 16 november 2021

Lees verder
Willekeurige foto